Поиск

132221451_gorod_Brempton (202x216, 31Kb)

Холдор Вулқон

Ўзбекистон Ёзувчилари уюшмасининг аъзоси


Баҳор оқшоми



Кўз ёшдай тўкилар гилос гуллари,
Сўнади уфқларда оташи сўзон.
Ҳаловат тўшалган боғда тунлари,
Нафис ой шуъласи, гўзал гул тўзон.

Оппоқ гул ёғади мисоли рўё,
Қалдирғоч ухлайди тумшуқлари лой.
Кул билан ювилган идишдай гўё,
Сокин ховузларга чўкиб кетар ой.



13 май, 2014 йил.
Кундуз соат 10 дан 24 дақиқа ўтди.
Канада.



Олис оқшомлар



Шом қушлари сайрайди толда,
Балки эшик турар очилиб.
Ғамгин шуъла тўшалган полда,
Китобларим ётар сочилиб.

Кулбаларда чироқ ёқарлар,
Пахтазор жим сукутга чўмар.
Юм - юм йиғлаб искабтопарлар,
Шом ҳасратин соҳилга кўмар.

Юлғун ўсган жарлар узра жим,
Аста секин кўтарилар ой.
Ёришади менинг лабларим,
Лабларинга муҳр босган жой.

Идиш ювиб ариқ бўйида,
У дамларни эсласанг гоҳи,
Чигирткадай гулзор қўйнида,
Чириллайди севги арвохи.



9 апрель, 2011 йил.
Кундуз соат 3 дан 35 минут ўтди.
Торонто шаҳри, Канада.


Кимсасиз йўлларда



Сувга чўкиб кетди булутлар,
Кўриб кузги гуллар ибосин.
Қирғоқларда тераклар, тутлар,
Сув оқизар боғлар либосин.

Гала гала қушлар нарида,
Шиддат билан учар қайгадир.
Балки дарё соҳилларида,
Шоли пишиб ётган жойгадир?

Кўприк узра соҳибжамол қиз,
Термулади сувга, ариққа.
Кезар маъюс, ўйчан қари куз,
Сочларини бўяб сариққа.




26 август, 2010 йил.
Кундуз соат 10 дан 58 дақиқа ўтди.
Торонто шаҳри, Канада.



Зулматларда учқунлайди қор



Бу хазон, кўзлари ожиз ошиқнинг
Қўлидаги ўқилмаган хат.
Кимсасизлик, сукунат балки,
Сўзсиз қўшиғидир соқов ҳофизнинг.

Мен бўлсам,
Кузги далаларда, тунги зулматда
Ёлғиз увлаётган қора шамолман.

Сен пастак дераза ёнида,
Қировли гулзорда булбулни кутиб,
Музлаб қолган атиргулмисан?

Чирпираб учаётган қор учқунларичи?
Ёруғ ойналарга талпинаётган
Сон - саноқсиз оппоқ парвоналарми?..

Айтгил, нима учун, кимни соғиниб,
Сочлари қувв оқарди қишнинг?



20 август, 2012 йил.
Кундуз соат 3 дан 20 минут ўтди.
Торонто шаҳри, Канада.



Соҳилларни соғинган кўнгил



Тўрғай бўлсам тонги далада,
Чуғурлардим муаллақ сайраб.
Қарар эдинг қувнаб янада,
Кўзга кафтинг соябон айлаб.

Типратикон бўлсам, бутунлай,
Мен Ватандан кетмасдим бадар.
Ой ёритган ховлингда тинмай,
Чопар эдим то тонга қадар.

Муҳаббатнинг рубоби синди,
Шамол бўлиб йиғлади қувғин.
Биз учрашган далада энди,
Ғувиллайди қоп - қора юлғун.

Дов дарахтни кеч куз қаритган,
Боғларда бор ҳаё ва шарм.
Соҳилларни ғамгин ёритган,
Ой кўнглимиз сингари ярим.



19 июнь, 2011 йил, якшанба.
Кундаз соат 10 дан 57 минут ўтди.
Торонто шаҳри, Канада.


Биринчи қор



Оппоқ қор қоплагач далалар рохин,
Анграйганча тилдан қолибди боғлар.
Қор юки эгибди дарахтлар шохин,
Қахрли қағиллар туманда зоғлар.

Бақирмай секинроқ қағилласа ҳам,
Эшитаман ахир, эмасман гаранг.
Қоркўчки қўзғолар йўталса одам,
Қор турар дарахтлар шохида аранг.

Дарахтлар кийинган, олифта, кибор,
Оппоқ қорпўстини терсми ё ўнги?
Бу оппоқ таҳайюр, бу мусаффо қор,
Кимгадир биринчи, кимгадир сўнги...

Қор босган далалар бесадо, бесас,
Ҳеч ким ҳалал бермас хаёллар сурсанг.
Йўловчи жилмайиб қўяр, ранжимас,
Қулочкашлаб туриб, қор билан урсанг.



9 январ, 2013 йил.
Тунги соат 8 дан 17 дақиқа ўтди.
Кембридж шаҳри, Канада.



Дон Миллс



Қуёшни ҳайбатли гулханда ёққан,
Ботаргох қонталаш жарохат каби.
Сувлари ялтираб, лапанглаб оққан,
Бир азим дарёнинг қақрайди лаби.

Қийиллаб учгувчи қушларнинг лекин,
Шовқин - суронига мухтож эмас ул.
Бу дарё сувида оқади сокин,
Булбул тушларига кирган атиргул.

Кечувлардан ўтмас сигирлар мораб,
Тўлқинлари туя, тубсиз, ўзансиз.
Шундай дарёлар ҳам бўларкан, ё Раб,
Ойдин тўқайларсиз, Тулки, Кўзансиз.

Бўйнига энг оғир тошларни боғлаб,
Ғарқ бўлгиси келар ҳар кимнинг, ахир.
Ғарқ бўлган чоғимда кўксимни доғлаб,
Қуриб қолма, Шопен деб аталган наҳр!

Дон Миллс паркларида кезсам ҳайнаҳой,
Минмайман шайтоннинг аробасини.
Ўрмонлар ортидан кўтарилган ой,
Ёритар кўнглимнинг харобасини.



25 июнь, 2011 йил.
Тунги соат 10 дан 40 минут ўтди.
Торонто шаҳри, Канада.


Хирмонларни ёритганда ой



Куз хазонрез боғларни қучган,
Етим каби ёлғиз ўйнар ел.
Қўл силкитар жанубга учган,
Турналарнинг карвонига эл.

Шамолларда шовуллаб ётар,
Маслахат деб аталган қишлоқ.
Қуёш тоғлар ортига ботар,
Шом шамоллар шаштига муштоқ.

Шоли ғарам устида ётиб,
Тинглайверсанг, кимдир гапирса.
Курак билан шамолга отиб,
Ойдинда эл шоли шопирса.

Қурилласа маюс бақалар,
Тулки юрса тимирскаланиб.
Чопса ёлғиз дарё ёқалаб,
Искабтопарларга таланиб.

Куйганёрдан чинқириб ўтса,
Темир йўлнинг пўлат самани.
Соҳилларда чарақлаб ётса,
Чироқларнинг олмос чамани.



26 октябр, 2014 йил.
Кундуз соат 10 дан 9 дақиқа ўтди.
Канада.


Омонат япроқлар



Гоҳо ортда қолдим, гоҳида ўзиб,
Гўё бу йўлларнинг йўқдай адоғи.
Гулзорлардан нафис бўйнини чўзиб,
Менга талпинарди гуллар дудоғи.

Бугун бужмайибди, қурибди гуллар,
Гўё чаманларга теккандай қарғиш.
Дарахтлар мунғайган қадрсиз қуллар,
Шохлари ялонғоч, барглари сарғиш.

Чинор ёзган экан фаррошга хатни,
Четларига битиб хасратли хокку.
Фаррош у мактубни гулханга отди,
Энди оҳ чекмайди олисда какку.

Дарахт қир учида омонат зоғлар,
Сукунатга тўлар осмон қозони.
Секинроқ юраман мен бундай чоғлар,
Тўкилмасин дея боғлар хазони.



15 октябр, 2014 йил.
Кеч соат 7 дан 57 дақиқа ўтди.
Канада.

 

 

Дўст

(Ўзбекнинг энг ёниқ лирик шоирларидан бири, марҳум дўстим Равшан Файз ҳотирасига)



Гуллар ернинг табассумлари ,
Қайда ?  - дея берма саволлар .
Саф чекар дов дарахт лашкари,
Эсар ёвуз, вахший шамоллар .

Бошланаркан булут босқини,
Шаррос қуяр шиддатли жала .
Ариқларда сувлар тошқини,
Кўринмайди ёмғирда дала.

Куз келади сўнгра сездирмай,
Сукунатда хазонлар рақси.
Ботаргохда шом қушларининг,
Муросасиз шовқини, бахси.

Хувиллатиб борлиқни сўнгра,
Қушлар кетар инларин ташлаб.
Қолмагандай яшашдан маъно,
Дўст кетгандай кўзингни ёшлаб.



2003 йил , 27 ноябрь . Тунги соат
9 дан 30 минут ўтди. Андижон .



Синглим Анорага



Руҳим ойдинларда дайдиган сувчи,
Мен сени эслайман, кунда, кун ора.
Жилмайиб, йиғловчи, йиғлаб, жилмайгувчи,
Менинг ювошгина синглим, Анора.

Субҳи содиқ маҳал тақирлатсалар,
Томлар туникасин ёмғирлар чўқиб.
Ўлтирарсан балки меҳробда саҳар,
Сокин сукунатда номозинг ўқиб.

Кўзингдан ёмғирдай тирқирамасин,
Кўз ёшинг суюлган олмосдай оқиб.
Овозсиз йиғласанг, ҳувиллаб ётган,
Акангнинг кимсасиз уйига боқиб.

Кўз ёшинг бебаҳо дур каби асра,
Тинсин кузги сувлар сингари асаб.
Майли ховлимизда заъфарон ҳасрат,
Юрсин япроқлардан гербарий ясаб.



6 август, 2010 йил.
Кундуз соат 8 дан 4 дақиқа ўтди.
Торонто шаҳри, Канада.

 

Куз илҳомлари



Воҳ,  кузги  дарахт  шаклида  ҳайронани  кўрдим,
Ёлғиз  ва  ғариб,  бир  дили  вайронани  кўрдим.

Жим - жит  кўчада    ўйнади   раққоса    шамоллар,
Чарх  урди  ҳазон  гирвати,  парвонани  кўрдим.

Дарчам  ёнидан  ўтди  учиб  ёввойи  ғозлар,
Ҳижрон  тўла  дил   аксида    девонани  кўрдим.

Қушлар  уясин   тутди   дарахт   шохида,  ё,  Раб,
Инларга  боқиб  ғам  тўла  паймонани  кўрдим.

Заъфар  капалаклар  каби   учганда  хазонлар,
Баргларга  кўмилган  кўча ,  остонани   кўрдим.

Йўлларга  хазонлар  тўшади  кузги  Торонто,
Боққанча  чинор  баргига  Фарғонани   кўрдим.

Қалбимда  Худо,  Каъбага  ўхшайди  вужудим,
Сипқоргали  ишқ  бодаси - майхонани  кўрдим.

Дўст  топмади  Вулқон  бу  жаҳон  мулкида  излаб,
Ҳар  ерда  ғаним,  вахшати  бегонани  кўрдим.




26  октябрь,  2010  йил.
Тонги  соат  7  дан  35  минут  ўтди.
Торонто  шаҳри,  Канада.

 

x_15d42282 (604x453, 162Kb)

 

 
kembdridj (458x542, 86Kb)

Холдор Вулқон

Ўзбекистон Ёзувчилари уюшмасининг аъзоси


Нийят


Зулматда чирилдоқ чириллаган он,
Тўлин ой порласа пайкалга қараб.
Яғир дўппинг кийиб, елкангда кетмон,
Далаларда юрсанг ёлғиз, сув тараб.

Сокин увотларда бўзрайса фонар,
Оқшом юлдузларни бирма бир ёқса.
Оғзини ланг очиб ойдин далалар,
Ойнинг қўрғонига ағрайиб боқса.

Сувлар жилдираса, пушталар тўлиб,
Кўршапалак учса шодон, овозсиз.
Ўлтирсанг порлаган ойга термулиб.
Оддий сувчи бўлсанг, бўлсанг саводсиз.

Шийпон тамондаги сўрида ётсанг,
Ғир - ғир эсаверса тунги шабада.
Уйғонсанг тўрғайлар чулдираётган,
Ўз она юртингда, тонги далада.



7-август, 2010 йил.
Тунги соат 1 дан 56 дақиқа ўтди.
Торонто шаҳри, Канада.


Куз ёмғири



Ўйланасан кузги кечада,
Чеки борми дея фироқнинг.
Эси оғар бўм -бўш кўчада,
Маюс ўйга ботган чироқнинг.

Тўлар сирли шивирга ҳаво,
Руҳинг каби мусаффо, тоза.
Наҳот севги айлади қазо,
Ёмғир кимга очмоқда аза?..

Осмонларга элагин тутар,
Фонус ғамгин нурин элаклаб.
Бўм -бўш шаҳар уйқуга кетар,
Куз ёмғири қуяр челаклаб.


27 май, 2014 йил.
Тунги соат 10 дан 49 дақиқа ўтди.
Канада.


Кузги қайин



Хазонларни учирмоққа шай,
Кузнинг ўйчан, латиф шамоли.
Автоулов чумолихўрдай,
Ишга шошган авом -чумоли.

Чирпирайди етим япроқлар,
Куз келтирди баргларга қирон.
Хазон эмас, тилла титроқлар,
Қўрқитади уларни бўрон.

Ўйламайди бу ҳақда қайин,
Кокилларин ёйиб насимга.
Йўл бўйида шовуллаб майин,
Қайта -қайта тушар расмга.


27 октябр,2014 йил.
Эрта билан соат 9 дан 1 дақиқа ўтди.
Бремптон шаҳри, Канада.


Ғозлар галасининг бўм -бўш челаги




Ёғар куз ёмғири майдалаб, эзиб,
Ёмғирда ювилган ойнадай туйғу.
Ҳиёбонда ёлғиз юрарман кезиб,
Кўлмаклар кўзида исмсиз қайғу.

Сув юзида ғамгин кумуш халқалар,
Шивирлар қамишли соҳиллар лаби.
Бир юпун мажнунтол ёлғиз чайқалар,
Унсиз йиғлаётган паризод каби.

Охир тамом бўлди ёмғир кўз ёши,
Табиат йиғидан тўхтади, тинди.
Ёмғирда ювилган соҳиллар тоши,
Борлиққа мусаффо ҳаловат инди.

Тортинчоқ ялонғоч боғлар бир ёнда,
Ойнадек ялтирар боғлар йўлаги.
Ғийт - ғийт этар кузги ғамгин осмонда,
Ғозлар галасининг бўм - бўш челаги.



9 июль, 2011 йил.
Тунги соат 2 дан 36 дақиқа ўтди.
Торонто шаҳри, Канада.


Кузги ойналарнинг унсиз кўз ёши




Ёмғирларда ялтирайди тош,
Қарар ўйчан табиат ромдан.
Ёғаётган ёмғирмас, кўз ёш,
Кўзларингдан дувиллаб томган.

Сен кетасан соябон қўлда,
Олислайсан мисоли рўё.
Дарахт акси, кўлмакли йўлда,
Чўккан каби кўзгуга гўё.

Сенсиз энди юрак қийналар,
Эриб борар изларингда қум.
Сен кетасан, ғамгин ойналар,
Одам каби йиғлайди юм - юм.



31 июл, 2011 йил.
Кундуз соат 1 дан 29 минут ўтди.
Торонто шаҳри, Канада.




Кузги хазонларга кўмилди йўллар




Ловуллаб ёнганча кузги гулханда,
Гувиллар хаёли паришон боғлар.
Ўйчан куз лабида қахрабо ханда,
Телба гирватларга термулган чоғлар.

Боди изғиринда ялонғоч, юпун,
Яланг новдалари қолса ҳам қақшаб,
Оппоқ чойшаб ичра ухламоқ учун,
Боғлар ечинаркан аёлга ўхшаб.

Дарёнинг лабида қамишлар найи,
Хазонга кўмилар йўлаклар, томлар,
Кўча фонусига тираб манглайин,
Йиғласа мўридай қорайган шомлар.

Олис ўлкалардан келгандай қайтиб,
Дарчангдан тўлин ой мўралаган пайт,
Адашган йўловчи сингари дайдиб,
Гоҳо тушларинга кираманми, айт?



13 август, 2011 йил.
Кундуз соат 3 дан 23 минут ўтди.
Торонто шаҳри, Канада.

 

 

x_15d42282 (604x453, 162Kb)

 

 
kembdridj (458x542, 86Kb)

Холдор Вулқон

Ўзбекистон Ёзувчилари уюшмасининг аъзоси

 

Ҳикматларга амал қилиб яшайлик



Бу дунёда ҳар бир халқ ўз ота -боболари қолдирган мақолларга, ҳикматли сўзларга амал қилиб яшамоғи керак.


Негаки у ҳикматлар ўша ҳалқнинг табиатига, зехниятига ғоят мос ва яқиндир.


Ота боболаридан қолган ҳикматли сўзлар ўша халқ қўлида мангу сўнмас машъала каби зулматли йўлларини ёритади, шуурини ойдинлаштиради, ақлини чароғон этади.


Минг -минг йиллар чиғириғидан ўтган, асрлар ғалвирида қолган олмос доналаридай бебаҳо у ҳикматларни кўз қорачиғидай асрамоғимиз ва келажак авлодларга етказмоғимиз керак.


У мақолларда ва ҳикматли сўзларда динимизга, миллий маданиятимизга, маънавиятимизга зид келадиган биронта ҳам зарарли сўз йўқ.


Уларнинг ҳаммаси ҳаётимизни тўғри ўзанга солишда бизга асқотадиган, бахиллик, хасад, кибру ҳаво ғуборларидан тобора хира тортиб бораётган қалбларимиз кўзгусини тозалаб, ярақлатадиган, гуноху маъсиятлардан қайтарадиган, қалбан ва жисман соғломлаштирадиган тенгсиз, беминнат дори -дармонлардир.


Мисол учун ҳаммамиз бирдек ҳурмат қиладиган севикли бобомиз ҳазрати Мир Алишер Навоийнинг:


Кимки бир кўнгли бузуқнинг ҳотирин шод айлади,

Онча бўлғай, Каъба вайрон бўлса, обод айлади.



деган мисраларини олайлик.


Энди тасаввур қилинг.


Ҳар йили миллиардлаб бандалар талпинадиган, теварагида йиғлаб, лаббайка айтиб, миллион миллион одамлар гирдобдай гувиллаб айланидиган муқаддас Каъба вайрон бўлишини тасаввур қилиб кўринг ва уни қайта обод айлаган одамга етадиган савобни кўз олдингизга келтиринг.


Кўнгилни, инсон қалбини унда Худо борлиги учун ҳам муқаддас каъбага қиёслайдилар.


Бугун ўз фаолияти билан барча ўзбекистонликлар қалбида умид учқунларини пайдо қилаётган амалдаги Ҳукумат ва Президент Шавкат Мирзиёев ҳам Навоий бобомиз айтган ўша буюк ҳикмат билан юзма -юз турибди.


Агар амалдаги Ҳукумат ва Президент Шавкат Мирзиёев олиб бораётган фаолият ҳақиқатан ҳам адолатли, шарқона демократияга мос келадиган сиёсат бўлса, биринчи Президент марҳум Ислом Каримовнинг минтақада тинчлик ва осойишталикни сақлаш йўлидаги хизматларини эътироф этган ҳолда, йиллар давомида йўл қўйилган айрим хатоларни такрорламаслиги, яъни ўз вақтида, азиз бошларини кундага қўйиб, қўлидан келганича адолатсизликка қарши мардона курашгани, қаттиқ қуруқ гаплар билан камчиликларни рўйи рост танқид қилгани учун Ислом Каримов тамонидан фуқаролиги бекор қилинган ватандошларимизнинг фуқаролигини қайта тиклаш,(агар терроризм билан шуғулланмаган бўлса, қидирувда бўлмаса) уларнинг қадр -қимматини жойига қўйиш ва ҳурмат эҳтиром билан Ватанга қайтишларини таъминлаш йўлида Ҳукуматнинг махсус қарори қабул қилинса, ва бу борада Президентимиз Шавкат Мирзиёев тамонидан махсус фармон имзоланса, юқоридаги, Навоий бобомиз айтган ҳикматга мувофиқ бўлади.


Шунда бир эмас, юзлаб, минглаб вайрон бўлган, мунглиғ, ғариб кўнгиллар қайта обод бўлади, амалдаги ҳукуматга ва Президент Мирзиёевга бўлган элнинг ишончи ҳақиқий маънода мустахкамланади, халқимиз бирлашади, жаҳон ҳамжамияти олдида мамлакатимиз обрўси янада юксалади.


Ҳамиша юртимиз тинч, халқимиз омон бўлсин!




06/09/2017.

Кундуз соат 9:52.

Канада, Онтерио.

 

 

 
e401e36e5e689e8eab81fb4101f43f27 (450x280, 93Kb)

Ойдиннисо

Ойдиннисо, биринчи шеърингиз сўнгида "Ва нечун жимсан?" деб ёзиб қўйганингизда шеър янада кучаяр эди.Лекин шундоқ ҳам шеър ёмон эмас.Бошқа шеърларингиз ҳам шахсан менга маъқул бўлди.

(Х.В.)

* * *


Мен сени соғиндим!
Сен кимсан ўзи –
Кўнгилни муттасил зориқтирганим?
Мен сени севаман!
Сен кимсан ўзи –
Эй, мени ўзимга йўлиқтирганим?

Сен кимсан?
Ҳар лаҳза кутаман сени,
Қамишман – най бўлмоқ менга қаноат.
Сен эса кифтимга ортиб дунёни,
Дунёлар устида қоқтирдинг қанот!

Юрсам, сенга юрдим шахдам одимлаб,
Дилимда хиргойи, кўзда ҳайқириқ.
Ҳар лаҳза бир орзу чорлади имлаб,
Ҳар лаҳза ўртади мумтоз айрилиқ.

Чорласам, ёнимга довонлар келди,
Нафасим дунёни тебратди, эссам.
Яна сени эслаб, борлигим билдим,
Яна сени қўмсаб йиғладим –
Кимсан?!



* * *


Ибтидонинг интиҳоси бор,
Тугайди-ку бошланган ҳар не.
Нега менинг кўнглимда баҳор
Давом этаверар, тинмайди.

Деразани ёпиб ташлайман,
Бекинаман парда ортига.
“Эй ҳис, бир зум тин!” деб чидайман,
Димиққан уй зарда-додига.

Бир жарангдор куй янглиғ офтоб
Юрагимга ботар ярқираб.
Гуллайверар қайтадан истак,
Оқаверар ҳислар шарқираб.

Ураётган юрак эмас, йўқ,
Кўксим тўла қушлар сайроғи.
Вужудимга кирар бостириб,
Баҳорларнинг беором боғи.

Кўзни юмиб санайман, минглар,
Миллионлар қуволмас ўйни.
Гўё олам узлуксиз тинглар
Шовиллаган баҳорий куйни.

Гулбаргларни узаман бир-бир,
Санайман: “Севади, севмайди”.
Дунёда бир шу буюк иш бор,
Қолган бари туюлар майда.

Яшаш эмас, севиш бор мудом,
Ҳар толаму ҳар заррам сезги.
Ҳечам севиб тугатолмадим,
Тугатарми ё мени севги?


Подробнее...

 

kembdridj (458x542, 86Kb)

Холдор Вулқон

Ўзбекистон Ёзувчилари уюшмасининг аъзоси

 

 

Яхшилик


Собиқ совет замонлари эди.Мен туғилиб ўсган Маслахат қишлоғи марказида жойлашган юқумли касалликлар бўлими маҳаллий аҳоли хаётига жиддий хавф туғдира бошлади.Сариқ касаллар даволанадиган бу маскандан учиб чиққан пашшалар элнинг дастурхонига қўнса, қушлар узум, анжир ва гилосларни чўқир, сариқ касалларнинг қонини сўрган искабтопарлар ташқаридаги соғлом ҳамқишлоқларни чақиб инфекция тарқатар, ит –мушуклар ҳам болаларга бу мудхиш касалликни юқтирар эди.

Натижада аҳолининг ишга яроқли қатлами жигари шишиб, секин аста яроқсизлана бошлади.Сариқ касали билан ўлган болалар ва катталар сони кўпайиб, вазият дахшатли тус ола бошлади.

Ҳатто касалхона ёнидан ўтаётиб димоқни ёргувчи мурдалар хидини сезадиган бўлиб қолдик.

Менинг бу масалада ёрдам сўраб бормаган жойим деярли қолмади.Охири, тўйда, омма олдида сўзга чиқиб, элга вазиятни тушунтирдим ва эртага ҳамма кундуз соат 12 да сариқ больница олдида ўтказиладиган норозилик митингига чиқишларини илтимос қилдим.

Эртасига ўзим биринчи бўлиб касалхона ёнига келдим.Соат 11 ярим бўляпти ҳамки одамлардан дарак йўқ.Мен асабийлаша бошладим.Лекин соат 12 деганда касалхона тамонга ҳамқишлоқларим дарёдай оқиб кела бошлади.Негадир бирдан хўрлигим келиб, кўзларим аччиқ ёшга тўлди.Лекин буни ҳеч кимга сездирмадим.Туйнукка назар ташласам, Аллакпар деган духтир ва бошқалар оқ халатларини хилпиратиб, оёғи куйган товуқдай визиллаб юришибди.Ўшалар телефон қилганми, валлохи аълам, бир зумда район хокимлигининг мутасаддилари, милициянинг катталари оператив группа билан етиб келишди.Улар орасида ўша пайтдаги ижроқўм раиси, ўзимнинг амаким Назиржон Саидов ҳам бор.Мўминов деган райкомнинг биринчи ўринбосари, гарчанд негалигини ўзимиздан кўра яхшироқ билсада, билмаганга олиб, тўпланганимиз сабаби билан қизиқа бошлади.Мен унга тушунтирдим.

-Ука, сиз билан касалхонага кириб, юзма юз ўтириб, шу муаммо юзасидан гаплашиб олсак бўладими? –деди у.Бу гапни эшитиб, хамқишлоқларим гурр этиб мени ўраб олишди ва Абдумалик ака деган одам: -Йўқ, Холдор Вулқон бизнинг бошлиғимиз!У ҳеч қаёққа кетмайди!Шу одам тўплан деса тўпланамиз, тарқал деса, тарқаламиз! –деди.

-Менинг халқдан яширадиган сирим йўқ.Нима гап бўлса, шу ерда гаплашаверамиз.Бизнинг талабимиз бир хафта ичида сариқ больницани қишлоғимиз марказидан кўчириш!Касалхона кўчирилмагунича митинг давом этаверади! –дедим мен қатъий.Назиржон Саидов бўлса: -Сен билан бизнинг томиримизда оқятган қон битта, тўғрими?Ҳеч йўқ менинг гапимга кирарсан? –дея мени ўз позициямдан қайтаришга урина бошлади.У ёқда сариқдан ҳамқишлоқлар пашшадек қириляптию, унинг, ўз ҳамқишлоғимизнинг, кап - катта раҳбарнинг гапини қаранг.Улар сариқ больницани кўчириш учун фалонча пул кетади, сиз буни тушунасизми ўзи?! -дейишди менга.

-Тушунаман, лекин наҳотки ўша сиз айтаётган сумма одамларнинг, аҳолининг, сариқдан ўлаётган болаларнинг ҳаётиданда қимматроқ бўлса? -дедим мен.

Шу маҳал Фозил ака деган ҳамқишлоғимиз мотоциклда етиб келиб, тўхтар экан, кўйлагини ечди.Сўнг уни мотоцикл бензобакига тиқиб бензинга чийлар экан, чўнтагидан зажигалкасини олдида, менга қараб: -Холдор!Айт, ука, бир оғиз “огонь!” десанг бўлди, шартта банисасига ўт тортвораман! –деди касалхонага яқинлашиб.Мен уни тўхтатдим.Муаммони уруш –жанжал билан эмас, тинч музокара йўли билан ҳал қиламиз! –дедим.Шундан кейин, келган катталар бу масалада бир хафта мухлат беришимизни сўраб, машиналарига ўтириб, жўнаб кетишди.Митинг тугагач, юз метрлар нарида митинга қўшилмай воқеани зимдан кузатиб ўтирган эхтиёткор одамлар менинг ёнимга келиб, “Холдорбек, бопладингизда ўзиям” дея мени табриклай бошлади.Шунда кимдир мийиғида кулиб қўйди.Сабабини сўрасам, у табрикловчилар митинга қўшилмай, “Ҳозир шу болани ит тутгандай тутиб кетишади” дея башорат қилиб ўтиришганини, энди бўлса мени табриклаётганларини айтиб берди.Майли, у одамларнику тушунса бўлар.Лекин ўша пайтдаги раҳбарларчи?Ахир бу иш билан мен эмас, мандатли депутатлар шуғилланишлари керак эдику?

Дарвоқе, бир хафта ўтгач, сариқ касаллар даволанадиган касалхона қишлоғимиз марказидан Олитнкўл тамонга, аҳоли яшамайдиган чекка жойга кўчирилди.

Ҳох ишонинг ҳох ишонманг, қишлоғимизга қўшни Қораянтоқ маҳалласининг аҳолиси ҳатто мустақилликдан кейин ҳам қабристон йўқлиги сабаб, яқин яқинларгача ўз марҳум маҳалладошларини қўшни қишлоқларга дафн этиб юришар экан.Бу масалада ёрдам сўраб бечораларнинг бормаган жойи қолмабди.Охири менга мурожаат этишди.Мен раису ҳокимлар билан бўғишиб юриб, ўша қишлоққа қабристон ажраттирдим.Қораянтоқликларнинг қувонганларини, дуо қилганларини бир кўрсангиз эди.Бир куни Андижоннинг эски шаҳарида бир Абдурахмон ака деган қораянтоқлик билан учрашиб қолдик.У мен билан қучоқлашиб кўришиб: -Ука,сизга катта раҳмат.Қабристонимизга ҳар гал марҳум дафн қилинганда, халойиқ албатта сизнинг ҳаққингизга ҳам дуо қиляпти –деди.Балки ишонмассиз.Лекин у гаплар мен учун миллиард доллардан ҳам қиммат эди.Элга яхшилик қилиб, унинг қувонганини кўриш дунёда энг катта бахт эканини ҳис қилганман ўшанда.Анашу дуоларга, яхшилик қилиш гаштига мазахўрак бўлиб, кўп қишлоқларнинг газлаштирилишига, тоза ичимлик суви билан таъминланишига сабабчи бўлдим, Худога шукур.

Бу гаплар кимгадир мақтаниш бўлиб туюлиши мумкин.Аммо мен ўша эзгу ишларимдан, менга нон туз бериб катта қилган элга озгина бўлса ҳам фойда келтиришга улгурганимдан фахрланаман.

Бундан бир неча йил аввал бир ҳамқишлоғим билан телефон орқали тасодифан гаплашиб қолдик.У ҳам эл қатори Россияда тирикчилик қилиб юрган экан.У телефонда: -Холдор ака, қачон Ватанга қайтасиз? Ҳамма ҳамқишлоқлар сизни кутяпти. Сизни жуда соғиниб кетдик –деган эди, “мен ҳам сизларни жуда соғиндим” демоқчи бўлдиму, лекин томоғимга тош тиқилгандай гапиролмай қолдим.Кўзларим аччиқ кўз ёшлардан хиралашиб кетди.Ахир у менинг қариндошим ёки укам, жигарим эмас, ҳамқишлоғим эди ҳалос.Мени ҳамма унутди деб юрган эдимда.Унутишмабди.Эсимда, бир маҳаллани газлаштиришда ёрдамлашаганим учун ўша маҳалла вакиллари тунука табличкаларга “Холдор Вулқон кўчаси” деган ёзувни ёзиб, бу ҳақда менинг фикримни билиш учун уйимга келишибди.Бу нарса бир тамонда бироз кулгилироқ бўлса, иккинчи тамондан ўша маҳалла аҳолисининг менга билдирган эҳтироми эди.Бир куни ўша кўчадан ўтиб кетаётсам, бир кампир чиқиб: -Ўғлим, маҳалламизга сиз туфайли газ келди.Ҳар гал газга чой қўйганимизда, қозон осганимизда дарров сиз ёдимизга тушасиз ва оиламиз билан сизнинг ҳаққингизга дуо қиламиз –деган эди.

Ким, билади, балки баланд уйнинг учинчи қаватидан бетонга йиқилиб ҳам ўлмаганимнинг, яна отдай соғайиб кетганимнинг, икки тилда роман, повестлар ва шеърий китоблар ёзиб, бахтли яшаётганимнинг сабаби ҳам аслида элнинг дуосидир.

Элга беминнат яхшилик қилайлик.Элга яхшилик қилишнинг гашти бор.

Зеро Бобомиз Заҳириддин Муҳаммад Бобур бир ғазалида:


Бори элға яхшилиқ қилғилки мундин яхши йўқ,

Ким дегайлар дахр аро қолди фалондин яхшилиқ.


дея бежиз ёзмаганлар.



24/08/2017.

Кундуз соат 4:41 дақиқа ўтди.

Канада, Онтерио.

 

0_c3d3f_4c0c2109_XL (700x462, 134Kb)

 

 
Еще статьи...