Поиск

Xoldor Vulqon

O'zbekiston Yozuvchilar uyushmasining a'zosi

 


O'zbekiston Respublikasi prezidenti Shavkat Miromonovich Mirziyoevga


Ushbu yozayotgan maktubim shomoldek shoshib, daryoday toshib, tez kunlar ichida yetib ma’lum va ravshan bo‘lsinkim, o‘shal O‘zbekistonning shishadek musaffo havosidan nafas olib, o‘z prezidentlik burchini ado etib yurgan Shavkatbek akamga deb bilgayman.

Assalomu alaykum, Shavkatbek aka.Yaxshi yuribsizmi?Kelin ayam, jiyanlar, nevara chevaralaringiz barchasi sog‘ va omonmi?Qiyinchilik, kamchiliklar yo‘qmi?Mendan so‘rasangiz, men ham sog‘ salomat yuribman, yozib chizib.Bir etak bola.Yettita farzandim, to‘rtta nevaram bor, Xudoga shukur.Beshinchi nevaram tug‘ilish arafasida, Xudo hoxlasa.

Duo qiling, aka, shu nevaram ham to‘rt mijozi sog‘, umri bilan, rizqi bilan dunyoga kelib, sizday ulug‘ inson bo‘lsin.

Aka, mana siz O‘zbekiston Respublikasining prezidentisiz.Men esa oddiy bir yozuvchiman.Lekin ikkimiz ham shu O‘zbek degan xalqning xizmatkorlarimiz.Siz siyosatda, men esa adabiyotda.Dunyo shunday qurilganki, shox ham gado ham qachondir qaydadir bir kuni albatta bu fano tuprog‘ini tark etadi.Insondan esa faqat hotira, hayotu dunyoda qilgan yaxshi amali hamda san’at darajasida yaratilgan asarlargina saqlanib qoladi.Qolgan hamma narsa yemrilishga, o‘zgarishga, ya’ni yo‘q bo‘lishga maxkum.

Bu haqda mening qachonlardir Vatanimda yozgan bir she’rim bor.O‘sha she’rdan bir band keltiraman.


Yuz yil avval yo‘q edim bunda,

Yo‘qligimdan qo‘rqmaganman hech.

Qo‘rqmagayman yo‘q bo‘lib qolsam,

Yuz yildan so‘ng, yoki erta kech.




Bu dunyo nari borsa, qo‘nib o‘tiladigan qo‘nalg‘a, oxirat safariga tadorik ko‘rayotgan muxojirlar, ya’ni insoniyat uchun Xudoi Taolo tamonidan qurilgan muallaq va muvaqqat bir hujra halos.

Taqdir taqozosi bilan xorijda hayot kechirayotgan biz kabi muhojirlar uchun vatanda kechayotgan siyosiy vaziyatni to‘la tasavvur qilish, yo‘nalishni to‘g‘ri belgilay olish juda mushkul.
Biz xuddi quyuq kuzgi tumanlar ichra, yoki oysiz zulmatda chiroqsiz qolgan yo‘lovchilarga o‘xshaymiz.Shu ma’noda kim do‘st va kim dushman ekanini ajratolmay, avvalgi maktublarim bilan, hayajonda biroz shoshma shosharlikka yo‘l qo‘ygan bo‘lishim ham mumkin.

Bu hatolar uchun sizdan uzr so‘rayman.

Yaqinda deng, bir qiziq voqea sodir bo‘ldi.Sizning vertual qabulxonangizga kirib, maktubimni yana bir tekshirib qo‘yish uchun sahifani ochsam, u yerda SNB rahbari o‘rinbosari B.Xodjayev degan odam imzosi bilan maktub turibdi.Maktubda O‘zbekiston Tashqi Ishlar vazirligi qoshidagi O‘zbekiston Elchixonasidan mening muammolarini o‘rganib chiqib, chora ko‘rishi so‘ralgan ekan.

Menga endi avvallari hech bunaqa maktub kelmagani uchun, xursand bo‘lib, bola chaqalarimga, qarindosh urug‘larga bu "hushxabar" haqida telefon qilib yuboribman.


Vatandagi ukamga; -Mana, Sharobiddin, sen ichkilikni tashlab, masjidga qatnab qolganing uchun duolaring ijobat bo‘lib, mening Vatanga qaytishimga Davlatimiz ijozat berdi - deb yuboribman.E, ishonsangiz, ukam bechora, uch to‘rtta bolali xo‘kizday yigit, xo‘rligi kelib yig‘lavordi.-Xudoga shukur, Xudoga shukur, aka! -deydi halos, ho‘ng ho‘ng yig‘lab.Men u bilan telefonda suhbatlashyapmanu, ukamning yig‘layotgan holatini, xo‘rlikdan maxsining qo‘njisiday bujmaygan aftini g‘oyibona tasavvur qilaman.


Hullas, ukam tushmagur hamma qarindosh urug‘larga, mahalladagilarga: - Akamning Vatanga qaytishiga Davlat ruxsat beribdi! -deb tarqatvoribdi.
Qarindosh urug‘lar meni Vatanga qaytyaptikan deb, xursandliklaridan jo‘r bo‘lib, chuvvos solib yig‘lashibdi.
Men bo‘lsam, haligi SNB chiqargan xatni vertikaligayu diagnaliga qayta qayta o‘qiyverib, uni xuddi bir muqaddas suraday yodlab oldim.Adolat bor ekanku -deyman nuqul, ko‘zlarimda jiqqa yosh bilan.O‘sha kuni do‘kondan tort, ko‘ka ko‘lya, har hil shirinligu yeguliklar harid qilib, uyda katta bayram tashkil qildim.


Komediya.


Nasriddin afandiyam mening qarshimda bir jiddiy odam.


Ayniqsa, mening stol atrofida, oila davrasida ko‘ka ko‘lyani kurushkaga quyvolib aytgan gaplarimni eshitsangiz, kulaverib qotib qolarittingiz.
Eng qizig‘i ertasiga boshlandi.Yashin tezligida butun O‘zbekistonga tarqalgan mening Vatanga "qaytayotganim" haqidagi xabardan sergaklanib, nujeli?!nahotki?! -deya, atrofga havotirli alanglab, menga umrida telefon qilmagan ayrim dingquloq stukachlar birdan faollashib deng, ko‘rib gaplashadigan zamonaviy telefonlarida birin ketin aloqaga chiqa boshladilar.Ular o‘zlarini xuddi samimiy tabriklayotgan hayrihox kishilarday tutsalarda, menga xuddi tergov izolyatorlarida tergovchilar tamonidan beriladigan savollarga o‘xshash ilmoqli savollarni berishar, mendan informatsiya olishga zo‘r berib urinishardi.


Men bo‘lsam, hayolan osmonlarda uchib yurardim.


Shirin hayollar surib, Vatanga qaytganimni, Toshkent Xalqaro aeroportida meni kazo kazo rahbarlaru yozuvchilar delegatsiyasi, qarindosh urug‘larim, sinfdosh do‘stlarim, uzun uzun cho‘paklarga mikrafonlarini osib olgan xalqaro va mahalliy jurnalistlar, hokimu hukamo, olimu ulamo, shoiru shuaro, hofizu huzalo, fozilu fuzalo, nog‘orai kalon, karnay surnay sadolari ostida kutib olayotganlarini tasavvur qilaman nuqul.

Ayniqsa, O‘zbekiston Yozuvchilar uyushmasi mening adabiyot sohasidagi ozmi ko‘pmi qilgan kamtarin xizmatlarimni xisobga olib, unvon bilan taqdirlagani ham ozday, umr bo‘yi mehnat mashaqqatlar bilan yozgan kitoblarimni bir necha jildli saylanma ko‘rinishida qalin muqovali qilib, yuqori sifatli qog‘ozga yuz ming, ba’zan ikki yuz ming tiraj bilan bepul nashr etganlarini o‘ylab yuragim xapqirib ketardi.

Hatto bir teleko‘rsatuvda jurnalistning: - yosh yozuvchi shoirlarga qimmatli maslaxatlaringiz -degan savoliga; - Yoshlar yaxshi shoir yozuvchi bo‘lishni hoxlasa, hech qachon hech narsa yozmasin -deganimni, va bu gapdan jurnalistning hayron bo‘lganini ko‘z oldimga keltirarkaman, hayolan so‘zlarimga shosha pisha aniqlik kiritardim.

-Ha, hech narsa yozmasinlar.Ularning asarlari o‘z -o‘zidan yozilib qolsin.Shundagina ular haqiqiy shoir yozuvchi bo‘lib yetishadilar -deyman.O‘sha kunlari shunday o‘y hayollar bilan osmonlarda uchib yurdim go‘yo.

Bir kuni yana vertual qabulxonaga kirib, sahifamni ochib, SNBning maktubini o‘qirkanman, pastda "javob" va "ko‘chirib olish uchun" degan tablitsalarga ko‘zim tushdi.Shundoq ochsam, u joyda O‘zbekiston Tashqi ishlar Vazirligi qoshidagi O‘zbekiston Elchixonasi chiqargan, mening 2015 yil sobiq prezident Islom Karimov imzolagan qarorga binoan fuqaroligimni yo‘qotganim va endi O‘zbekistonga faqat viza bilangina kirishim mumkinligi yozib qo‘yilgan eski maktub turardi.

Mening ahvolimni bir tasavvur qiling.Yig‘lashni ham kulishni ham bilmayman.Endi qarindosh urug‘larga, ukalarimga, mening Vatanga qaytayotganim haqidagi xabarni eshitib quvongan do‘stlarimga nima deyman, qanday telefon qilaman? -degan o‘y menga tinchlik bermasdi.

Bu mahal hamon chor tarafdan menga ko‘rib gaplashadigan antiqa zamonaviy telefonlar orqali ovozli qo‘ng‘iroqlar bo‘lib turar, hamma xursand.
Ayniqsa ho‘kmatdan gap tegib qolmasin deb, men bilan telefon orqali suxbatlashish tugul, hatto men haqimda o‘ylagani qo‘rqadiganlar ham jonlanib qolgandilar.

Keyin men bu telefondagi suhbatlar samimiyligini tekshirib ko‘rish uchun bir maqolamda 2015 yili sobiq prezident Islom Karimov tamonidan fuqaroligimni yo‘qotganim to‘g‘risdagi xabarni sizdirdim.

O‘sha maqola e’lon qilinishi bilanoq, stukachlarning ham, qarindosh urug‘, yoru do‘stlarning ham telefonlari xuddi shudring tushgan tungi bedazordagi chigirtkalar ovozidek o‘chdi qoldi.
Hatto ukalarimning telefonlari ham jim.


Hayotimni yana zulmat qopladi.

Yaxshiyam deng, aka, baxtimga kitob bor, adabiyot bor, she’r bor.Adabiyot bo‘lmaganida, men allaqachon xorom qotgan bo‘lardim.
Xudoga shukurlarkim, xorijdagi umrim bekorga o‘tmadi.Men shunga xursandman.

Hurmatli prezident, mening sizga yozayotgan ushbu maktubim asrlar osha tarix saxifalarida qolishiga ishonaman.Uning salbiy yoki ijobiy javob topishi esa, endi sizga bog‘liq.Men va menga o‘xshab, Vatanda demokratiya, so‘z va fikr erkinligi bo‘lishini istab, o‘sha paytdagi siyosatni tanqid ostiga olgani uchungina bola chaqasi bilan nohaq xorijga quvilgan, adolatsizlarcha fuqaroligi bekor qilingan O‘zbekiston fuqarolarining fuqarolik statuslarini qayta tiklanishiga, Vatanga qaytishlariga yordam bering.

 

 

 

13/03/2018.

Tongi soat 8:10.

Kanada, Onterio.

 

 

Xoldor Vulqon

O'zbekiston Yozuvchilar uyushmasining a'zosi

 

Tog'am Hurmuhammad Kenjaevning porloq hotirasiga


Hurmuhammad tog‘am she’riyatni teran anglaydigan, oliygoxni tamomlagan ziyoliy inson bo‘lganlari uchun mening she’rlarimni tahlil qilib, boshqalarga tushintirib yurar edi.Ayniqsa: bir she’rimdagi "Osmon o simon.Xuddi yo‘qlik ramzi 0 raqamiday" degan tashbehdan uzoq hayrat va hayajon tuyib yurdilar.


Afsus shunday ajoyib inson, sevimli tog‘am olamdan o‘tib ketdilar.Ilohim, joylari Jannatdan bo‘lsin.


Anchadan beri u insonning muborak hotirasiga nimadir yozmoqchi bo‘lib yurardim.Bugun mavridi ekan.Kechasi yarim tunda uyg‘onib ketib, tog‘amning hotirasiga bir she’r yozdim.


Quyida shu she’rni o‘qiysiz.


22/10/2017.
Tungi soat 2:24.

Oydin sukunat

(Tog'am Hurmuhammad Kenjaevning porloq hotirasiga)



Tog‘a, Chuvamada hozir hoynahoy,
Oqshom tushib, quyosh botgandir.
Oppoq chinni tovoq kabi oy,
Tentaksoyda cho‘kib yotgandir?

Toshqin buzgan ko‘prik xodasi,
Taxtalari yotgandir ko‘chib?
Suv kechardi sigir podasi,
U ko‘prikdan o‘tgani cho‘chib.

Qurillaydi balki baqalar,
Qirg‘oqlarda qamishlar ohi.
Daydi tulki suvlar yoqalab,
Quloq tutar jimlikka gohi.

So‘qmoq uni sohilga boshlar,
G‘ir g‘ir esar tungi shabada.
Ko‘rinar suv ostida toshlar,
Bog‘bon esa uxlar kapada.

Yulduzlarni jimlik xoritar,
Olis osmon -ovoz yetmas joy.
Qabringizni g‘amgin yoritar,
Jim -jit, sokin sukunatda oy.



22/10/2017.
Tungi soat 1 dan 21 daqiqa o‘tdi.
Kanada, Onterio.

 

0_c3d3f_4c0c2109_XL (700x462, 134Kb)

 

 

Xoldor Vulqon

O'zbekiston Yozuvchilar uyushmasining a'zosi

 

O'rta Osiyoda ekologiya va suv muammolarini hal qilishga oid foydali taklif va mulohazalar


Oldindan aytib qo‘yay.Men ushbu maqolam bilan o‘zimni boshqalardan aqlli qilib ko‘rsatmoqchi emasman.

Aksincha, menga non -tuz, ilm berib, o‘stirib voyaga yetkazgan xalqimning oz bo‘lsada dardiga darmon bo‘lmoq, elimning tuzini oqlamoq maqsadidagina quyidagi maqolani yozmoqdaman.

Ma’lumki, Markaziy Osiyoda ekologik vaziyat yaxshilanishidan shu mintaqada yashaydigan barcha mamlakatlar birday manfaatdor.Shunday ekan,Kaspiy dengizidan Orol dengiziga suv olib kelish uchun Panama kanaliga o‘xshagan kanalni xashar yo‘li bilan qazish ishlarida O‘rta Osiyo mamlakatlari jon deb bosh qo‘shadilar va bu hayrli ishni amalga oshirish yo‘lida ular birgalikda harakat qiladilar.

Turkmaniston Respublikasining Prezidenti, Hukumati va aholisi ruxsat barsa, qo‘shnichilik ramzi bo‘lgan bu savobli ishga rozi bo‘lsa, mazkur DO‘STLIK kanalini Kaspiy dengizining qardosh Turkmaniston xududiga tegishli qismidan qazib kelinsa, biz taklif qilayotgan tarixiy loyixa bir muncha arzonga tushadi.Negaki bu masofa Qozog‘iston xududiga tutash Kaspiy dengizi sohillaridan Orol dengizigacha bo‘lgan masofaga qaraganda yaqinroq.

O‘zbekistonga qo‘shni qardosh mamlakatlar "Bizning suvga extiyojimiz yo‘q.Kaspiy dengizidan Orol dengiziga suv olib keladigan kanalni suvga muxtoj mamalakat o‘zi qazisin" deb bu hayrli ishdan bosh tortadigan mamlakat rahbarlari esa, Orol dengizining qurishi, ekologik muxitning buzilishi va shamolda uchadigan tuz va qum to‘zoni O‘rta Osiyo mintaqasida joylashgan barcha mamlakatlar uchun birday xavf tug‘dirishini, bugungi loqaydlik ertaga o‘nglab bo‘lmas tabiat kataklizmasiga aylanib, daxshatli oqibatlarga sabab bo‘lishi mumkinligini unitib qo‘ymasliklari kerak.

Endi ba’zilar: -Xo‘p, Kaspiy dengizidan Orol dengiziga kanal orqali suv olib kelindi ham deylik.Lekin dengiz suvi nafaqat iste’molga, balki dala ekinlarini sug‘orishga ham yaroqsizku? -deyishlari mumkin.

Ha, to‘g‘ri.

Lekin kanal orqali Kaspiy dengizidan olib kelingan dengiz suvi maxsus suv tozalash inshoatlarida filtrdan, diatom tuprog‘i, (opresnitel distilyator) qurilmasidan o‘tkazilib, tuzi cho‘ktrilsa va Gidroksin kalsiy yordamida kislotasi so‘ndirilsa, u mikroblari o‘ldirilgan suv nafaqat dala ekinlarini sug‘orishga, balki iste’mol uchun ham yaroqli suvga aylanadi.

Bunday inshoatlar yordamida dengiz suvini toza ichimlik suviga aylantirish tajribasini Amerika, Kanada va Isroil mamlakatlari misolida ko‘rish mumkin.

Isroil davlati avval Galiley dengizidan kanal orqali o‘z xududiga suv olib kelib, uni filtrlab, xatto cho‘l mintaqalarini ham ekinzoru bog‘ -rog‘larga aylantirgani bugun hech kimga sir emas.

Keyinchalik ular O‘rta Yer dengizidan suvni xuddi shu tariqa, kanal orqali o‘z mamlakati xududiga olib kelib, hozirda filtrlangan dengiz suvini tejab, tomchilab sug‘orish yo‘li bilan qaqrab yotgan yerlariga hayot bag‘ishlamoqdalar, qishloq xo‘jaligini yuksaltirib, bog‘dorchilik va agrar dexqon fermerchiligini yuqori darajada rivojlantirmoqdalar.

Ular aynan shu yo‘l bilan o‘z mamlakatlaridagi suv muammosini bartaraf qilishga erishdilar.

Biz yuqorida yozgan Kaspiy dengizidan kanal orqali orol dengiziga suv olib kelish yo‘lidagi qardosh, qo‘shni mamlakatlarning o‘zaro hamjixatligi allaqanday millatchilik, irqchilikka, panturkizm yoki panislomizm kabi radikal g‘oyalarga mutlaqo aloqasi yo‘q.

Qo‘shni qardosh mamlakatlar bir oila farzandlariday ahil inoq yashashlari bilan birga Rossiya, Xitoy, Yevropa va G‘arb mamlakatlari bilan ham dinidan va irqidan qat’iy nazar uyg‘unlikda, (garmoniyada) tolerant, ya’ni bag‘ri kenglik, o‘zaro hurmat va do‘stlikka qurilgan umuminsoniy g‘oyalar asosida yashamoqlari joiz.

Endi Kaspiy dengizidan Orol dengiziga suv olib kelishning O‘rta Osiyo mamlakatlari uchun asosiy foydalarini sanaymiz.

1.Orol dengizi suvga to‘ladi, O‘rta Osiyo mintaqasida izdan chiqqan ekologik muxit yaxshilanadi.

2.Kanal qurilishi davomida O‘rta Osiyo aholisining katta qismi ish bilan ta’minlanadi.

3.O‘zbekiston, Qirg‘iziston, Tojikiston mamlakatlarining eksport maxsulotlari kanalda qatnovi yo‘lga qo‘yiladigan suzuvchi transportlar yordamida Yevropa bozoriga olib chiqiladi.

4.Orol dengizida baliqchilik rivojlanadi, baliqlarni konservalaydigan,baliq uvildiriqlarini, ya’ni ikralarni qadoqlaydigan zavodlar evaziga dengiz bo‘yida yashaydigan Qozog‘istonning orolbo‘yi aholisi va Qoraqalpoqiston Avtonom Respublikasi, Xorazm vohasi, qardosh Turkmanistonning Xorazmga tutash O‘zbekistonga chegaradosh mintaqalaridagi aholisi ish bilan ta’minlanadi.

5.Kaspiy dengizidan keltirilguvchi suv yordamida qudratli elektrostansiyalarning turbinalarini ishga tushirish va ishlab chiqariladigan arzon elektr quvvati xisobiga O‘rta Osiyo mamlakatlari aholisini to‘la va uzuliksiz elektroenergiya bilan ta’minlash imkoniyati paydo bo‘ladi.

6. Bundan tashqari dengiz bo‘ylarida milliy bog‘lar, qo‘riqxonalar, dam olish maskanlari, plyajlar,sanatoriya - davolanish maskanlari, delfinariyalar, okeanariumlar, yaxtklublar barpo etilisa, mintaqada turizm ham rivojlanadi.

7.Bu o‘zaro hamjixatlik O‘rta Osiyodagi qardosh mamlakatlar do‘stligini mustaxkamlaydi.
O‘rta Osiyo mintaqasini ekologik nosozlikdan, iqtisodiy inqirozdan, o‘zaro janjalu urushlardan, vayronagarchiliklardan saqlaydi.


O‘rta Osiyo mintaqasida joylashgan qardosh va qo‘shni mamlakatlarning rahbarlari, turli ko‘zga ko‘rinmas, o‘rtabuzar g‘ayur kuchlarning fitna -provokatsiyalariga uchib, dedi dedi gaplarni ko‘paytirmasliklari, har bir so‘zni o‘ylab gapirib, aql bilan ish yuritmoqlari, o‘zaro janjallashmasliklari, aksincha mintaqada yuzaga kelgan va kelishi mumkin bo‘lgan ekologik, siyosiy -ijtimoiy muammolarni hamjixatlik bilan hal qilish san’atini o‘zlashtirmoqlari kerak.



19/10/2017.
Kunduz soat 12 dan 26 daqiqa o‘tdi.
Kanada, Onterio.

 

 

0_c3d3f_4c0c2109_XL (700x462, 134Kb)

 

 

 

224 (700x532, 99Kb)

Xoldor Vulqon

O'zbekiston Yozuvchilar uyushmasining a'zosi

Bahor oqshomi



Ko‘z yoshday to‘kilar gilos gullari,
So‘nadi ufqlarda otashi so‘zon.
Halovat to‘shalgan bog‘da tunlari,
Nafis oy shu’lasi, go‘zal gul to‘zon.

Oppoq gul yog‘adi misoli ro‘yo,
Qaldirg‘och uxlaydi tumshuqlari loy.
Kul bilan yuvilgan idishday go‘yo,
Sokin xovuzlarga cho‘kib ketar oy.



13 may, 2014 yil.
Kunduz soat 10 dan 24 daqiqa o‘tdi.
Kanada.



Olis oqshomlar



Shom qushlari sayraydi tolda,
Balki eshik turar ochilib.
G‘amgin shu’la to‘shalgan polda,
Kitoblarim yotar sochilib.

Kulbalarda chiroq yoqarlar,
Paxtazor jim sukutga cho‘mar.
Yum - yum yig‘lab iskabtoparlar,
Shom hasratin sohilga ko‘mar.

Yulg‘un o‘sgan jarlar uzra jim,
Asta sekin ko‘tarilar oy.
Yorishadi mening lablarim,
Lablaringa muhr bosgan joy.

Idish yuvib ariq bo‘yida,
U damlarni eslasang gohi,
Chigirtkaday gulzor qo‘ynida,
Chirillaydi sevgi arvoxi.



9 aprel, 2011 yil.
Kunduz soat 3 dan 35 minut o‘tdi.
Toronto shahri, Kanada.


Kimsasiz yo'llarda




Suvga cho‘kib ketdi bulutlar,
Ko‘rib kuzgi gullar ibosin.
Qirg‘oqlarda teraklar, tutlar,
Suv oqizar bog‘lar libosin.

Gala gala qushlar narida,
Shiddat bilan uchar qaygadir.
Balki daryo sohillarida,
Sholi pishib yotgan joygadir?

Ko‘prik uzra sohibjamol qiz,
Termuladi suvga, ariqqa.
Kezar ma’yus, o‘ychan qari kuz,
Sochlarini bo‘yab sariqqa.



26 avgust, 2010 yil.
Kunduz soat 10 dan 58 daqiqa o‘tdi.
Toronto shahri, Kanada.


Zulmatlarda uchqunlaydi qor


Bu xazon, ko‘zlari ojiz oshiqning
Qo‘lidagi o‘qilmagan xat.
Kimsasizlik, sukunat balki,
So‘zsiz qo‘shig‘idir soqov hofizning.

Men bo‘lsam,
Kuzgi dalalarda, tungi zulmatda
Yolg‘iz uvlayotgan qora shamolman.

Sen pastak deraza yonida,
Qirovli gulzorda bulbulni kutib,
Muzlab qolgan atirgulmisan?

Chirpirab uchayotgan qor uchqunlarichi?
Yorug‘ oynalarga talpinayotgan
Son - sanoqsiz oppoq parvonalarmi?..

Aytgil, nima uchun, kimni sog‘inib,
Sochlari quvv oqardi qishning?



20 avgust, 2012 yil.
Kunduz soat 3 dan 20 minut o‘tdi.
Toronto shahri, Kanada.



Sohillarni sog'ingan ko'ngil



To‘rg‘ay bo‘lsam tongi dalada,
Chug‘urlardim muallaq sayrab.
Qarar eding quvnab yanada,
Ko‘zga kafting soyabon aylab.

Tipratikon bo‘lsam, butunlay,
Men Vatandan ketmasdim badar.
Oy yoritgan xovlingda tinmay,
Chopar edim to tonga qadar.

Muhabbatning rubobi sindi,
Shamol bo‘lib yig‘ladi quvg‘in.
Biz uchrashgan dalada endi,
G‘uvillaydi qop - qora yulg‘un.

Dov daraxtni kech kuz qaritgan,
Bog‘larda bor hayo va sharm.
Sohillarni g‘amgin yoritgan,
Oy ko‘nglimiz singari yarim.



19 iyun, 2011 yil, yakshanba.
Kundaz soat 10 dan 57 minut o‘tdi.
Toronto shahri, Kanada.


Birinchi qor



Oppoq qor qoplagach dalalar roxin,
Angraygancha tildan qolibdi bog‘lar.
Qor yuki egibdi daraxtlar shoxin,
Qaxrli qag‘illar tumanda zog‘lar.

Baqirmay sekinroq qag‘illasa ham,
Eshitaman axir, emasman garang.
Qorko‘chki qo‘zg‘olar yo‘talsa odam,
Qor turar daraxtlar shoxida arang.

Daraxtlar kiyingan, olifta, kibor,
Oppoq qorpo‘stini tersmi yo o‘ngi?
Bu oppoq tahayyur, bu musaffo qor,
Kimgadir birinchi, kimgadir so‘ngi...

Qor bosgan dalalar besado, besas,
Hech kim halal bermas xayollar sursang.
Yo‘lovchi jilmayib qo‘yar, ranjimas,
Qulochkashlab turib, qor bilan ursang.



9 yanvar, 2013 yil.
Tungi soat 8 dan 17 daqiqa o‘tdi.
Kembridj shahri, Kanada.



Don Mills


Quyoshni haybatli gulxanda yoqqan,
Botargox qontalash jaroxat kabi.
Suvlari yaltirab, lapanglab oqqan,
Bir azim daryoning qaqraydi labi.

Qiyillab uchguvchi qushlarning lekin,
Shovqin - suroniga muxtoj emas ul.
Bu daryo suvida oqadi sokin,
Bulbul tushlariga kirgan atirgul.

Kechuvlardan o‘tmas sigirlar morab,
To‘lqinlari tuya, tubsiz, o‘zansiz.
Shunday daryolar ham bo‘larkan, yo Rab,
Oydin to‘qaylarsiz, Tulki, Ko‘zansiz.

Bo‘yniga eng og‘ir toshlarni bog‘lab,
G‘arq bo‘lgisi kelar har kimning, axir.
G‘arq bo‘lgan chog‘imda ko‘ksimni dog‘lab,
Qurib qolma, Shopen deb atalgan nahr!

Don Mills parklarida kezsam haynahoy,
Minmayman shaytonning arobasini.
O‘rmonlar ortidan ko‘tarilgan oy,
Yoritar ko‘nglimning xarobasini.



25 iyun, 2011 yil.
Tungi soat 10 dan 40 minut o‘tdi.
Toronto shahri, Kanada.


Xirmonlarni yoritganda oy



Kuz xazonrez bog‘larni quchgan,
Yetim kabi yolg‘iz o‘ynar yel.
Qo‘l silkitar janubga uchgan,
Turnalarning karvoniga el.

Shamollarda shovullab yotar,
Maslaxat deb atalgan qishloq.
Quyosh tog‘lar ortiga botar,
Shom shamollar shashtiga mushtoq.

Sholi g‘aram ustida yotib,
Tinglayversang, kimdir gapirsa.
Kurak bilan shamolga otib,
Oydinda el sholi shopirsa.

Qurillasa mayus baqalar,
Tulki yursa timirskalanib.
Chopsa yolg‘iz daryo yoqalab,
Iskabtoparlarga talanib.

Kuyganyordan chinqirib o‘tsa,
Temir yo‘lning po‘lat samani.
Sohillarda charaqlab yotsa,
Chiroqlarning olmos chamani.



26 oktyabr, 2014 yil.
Kunduz soat 10 dan 9 daqiqa o‘tdi.
Kanada.


Omonat yaproqlar




Goho ortda qoldim, gohida o‘zib,
Go‘yo bu yo‘llarning yo‘qday adog‘i.
Gulzorlardan nafis bo‘ynini cho‘zib,
Menga talpinardi gullar dudog‘i.

Bugun bujmayibdi, quribdi gullar,
Go‘yo chamanlarga tekkanday qarg‘ish.
Daraxtlar mung‘aygan qadrsiz qullar,
Shoxlari yalong‘och, barglari sarg‘ish.

Chinor yozgan ekan farroshga xatni,
Chetlariga bitib xasratli xokku.
Farrosh u maktubni gulxanga otdi,
Endi oh chekmaydi olisda kakku.

Daraxt qir uchida omonat zog‘lar,
Sukunatga to‘lar osmon qozoni.
Sekinroq yuraman men bunday chog‘lar,
To‘kilmasin deya bog‘lar xazoni.



15 oktyabr, 2014 yil.
Kech soat 7 dan 57 daqiqa o‘tdi.
Kanada.



Do'st

(O‘zbekning eng yoniq lirik shoirlaridan biri, marhum do‘stim Ravshan Fayz hotirasiga)



Gullar yerning tabassumlari ,
Qayda ? - deya berma savollar .
Saf chekar dov daraxt lashkari,
Esar yovuz, vaxshiy shamollar .

Boshlanarkan bulut bosqini,
Sharros quyar shiddatli jala .
Ariqlarda suvlar toshqini,
Ko‘rinmaydi yomg‘irda dala.

Kuz keladi so‘ngra sezdirmay,
Sukunatda xazonlar raqsi.
Botargoxda shom qushlarining,
Murosasiz shovqini, baxsi.

Xuvillatib borliqni so‘ngra,
Qushlar ketar inlarin tashlab.
Qolmaganday yashashdan ma’no,
Do‘st ketganday ko‘zingni yoshlab.



2003 yil , 27 noyabr . Tungi soat
9 dan 30 minut o‘tdi. Andijon .



Singlim Anoraga




Ruhim oydinlarda daydigan suvchi,
Men seni eslayman, kunda, kun ora.
Jilmayib, yig‘lovchi, yig‘lab, jilmayguvchi,
Mening yuvoshgina singlim, Anora.

Subhi sodiq mahal taqirlatsalar,
Tomlar tunikasin yomg‘irlar cho‘qib.
O‘ltirarsan balki mehrobda sahar,
Sokin sukunatda nomozing o‘qib.

Ko‘zingdan yomg‘irday tirqiramasin,
Ko‘z yoshing suyulgan olmosday oqib.
Ovozsiz yig‘lasang, huvillab yotgan,
Akangning kimsasiz uyiga boqib.

Ko‘z yoshing bebaho dur kabi asra,
Tinsin kuzgi suvlar singari asab.
Mayli xovlimizda za’faron hasrat,
Yursin yaproqlardan gerbariy yasab.



6 avgust, 2010 yil.
Kunduz soat 8 dan 4 daqiqa o‘tdi.
Toronto shahri, Kanada.


Kuz ilhomlari




Voh, kuzgi daraxt shaklida hayronani ko‘rdim,
Yolg‘iz va g‘arib, bir dili vayronani ko‘rdim.

Jim - jit ko‘chada o‘ynadi raqqosa shamollar,
Charx urdi hazon girvati, parvonani ko‘rdim.

Darcham yonidan o‘tdi uchib yovvoyi g‘ozlar,
Hijron to‘la dil aksida devonani ko‘rdim.

Qushlar uyasin tutdi daraxt shoxida, yo, Rab,
Inlarga boqib g‘am to‘la paymonani ko‘rdim.

Za’far kapalaklar kabi uchganda xazonlar,
Barglarga ko‘milgan ko‘cha , ostonani ko‘rdim.

Yo‘llarga xazonlar to‘shadi kuzgi Toronto,
Boqqancha chinor bargiga Farg‘onani ko‘rdim.

Qalbimda Xudo, Ka’baga o‘xshaydi vujudim,
Sipqorgali ishq bodasi - mayxonani ko‘rdim.

Do‘st topmadi Vulqon bu jahon mulkida izlab,
Har yerda g‘anim, vaxshati begonani ko‘rdim.




26 oktyabr, 2010 yil.
Tongi soat 7 dan 35 minut o‘tdi.
Toronto shahri, Kanada.

 

 

 

Xoldor Vulqon

O'zbekiston Yozuvchilar uyushmasining a'zosi

image (410x411, 24Kb)

Sportchimiz Murod Xonto'raev haqida



Ochig‘ini aytay, men bu maqolamda ko‘pchilikka ma’lum bo‘lgan, ammo yuragimizda hamisha faxru iftixor tuyg‘ularini uyg‘otguvchi milliy nasab to‘g‘risidagi qaytariqlarga to‘xtalaman.

Lekin bu narsa siz aziz o‘quvchini zeriktirib qo‘ymasin.
Maqolani oxrigacha o‘qing.Shunda mening nima demoqchi ekanligimni anglaysiz.

O‘zbekni ilk bor dunyoga tanitgan shonli bobomiz imperator Amir Temur hazratlari edi.

Amir Temurning chevarasi Zahiriddin Bobur ham o‘z bobosining jasorat va shijoatini insoniyat ko‘zi o‘ngida yana bir bor takrorladi.

Ilmu fanda esa hazrati Amir Temurning nabirasi Mirzo Ulug‘bekning koinotdagi yulduzlar sistemasini tuzib, xarita yaratganlari, ilk bor kosmosga yo‘l ochganlari barchaga ma’lum va mashhur.

Dunyo astronomlari Mirzo Ulug‘bek hurmati va hotirasi uchun Oydagi bitta kraterni, ya’ni vulqon o‘chog‘ini uning nomi bilan nomladilar.

Bobomiz Al Beruniy bo‘lsa, qushlarning egma parvoziga qarab turib, demak Yer yumaloq ekan degan qarorga keldi va Yer sharining birinchi maketi - GLOBUSni yasab, uni tuyaga ortib, shahru qishloqlarda elga namoish qildi, o‘z gipotezasini odamlarga tushuntirdi.

Ayrim g‘ayur to‘dalarning "Chig‘atoy tilida, ya’ni o‘zbek tilida nafaqat besh kitobdan iborat "Hamsa", balki oddiy g‘azal ham yozib bo‘lmaydi" deya Ona tilimizni taxqirlab, kamsitganlarida hazrati Amir Alisher Navoiy ona tilimizda lirik g‘azallar jamlangan "Hazoin ul maoniy"ni, va besh kitobdan iborat "Hamsa"ni boshqa xalqlarning shoirlaridan o‘tkazibroq yozdi, tilimiz qashshoq emasligini, aksincha, uning imkoniyatlari boshqa tillardan ortiqroq ekanini, o‘zbek shoirlarining iqtidori va qudratini dunyoga namoish qildi.

Bugun xalqimizni sportchilarimiz dunyoga tanitmoqda.
Jahon chempioni unvonini olgan qahramon sportchilarimiz shu qadar ko‘pki ularning ro‘yxati bu sahifaga sig‘maydi.Shu sabab, bugun ulardan faqat bittasigagina to‘xtalaman.

U sportchining ismi sharifi Murod Xonto‘rayev.

MMA -mixed martial arts - Mikst marshal arts yakkakurashi bo‘yicha jahon chempioni hamyurtimiz Murod Xonto‘rayevning oktogondagi shiddatli janglarini dunyoning turli chekkalarida yashayotgan o‘zbeklar va o‘zbekistonliklar hayajon bilan kuzatadilar va uning g‘alabalaridan yuraklari faxru iftixorga to‘ladi.


Xudo ilhom bersa, dunyoni hayratda qo‘yayotgan o‘zbek va o‘zbekistonlik sportchilarga bag‘ishlab she’r yozish niyyatim ham yo‘q emas.Ayniqsa Murod Xonto‘rayevga atab.

Bir intervyusida Murodjon Rossiya va Qozog‘iston prezidentlari ko‘zi o‘ngida o‘z raqibini qisqa vaqt ichida mag‘lub etganini aytgan jurnalistning: "shunda sizning dilingizdan nimalar kechdi?" degan savoliga, sportchining o‘kinch bilan: - o‘sha chempionat o‘tkazilayotgan saroyda mening Prezidentim ham ishtirok etganlarida edi -deya aytgan gaplarini eshitib, beixtiyor mening ko‘zlarimdan yosh chiqib ketdi.

Ha, O‘zbekistonimizning shunday vatanparvar paxlavon o‘g‘lonlari bor.Vatanimizda sport tobora gullab yashnayversin!

Negaki sport dunyo xalqlarini birlashtiradi, toza avlodni turli kasalliklardan aroqxo‘rlik, nashavandlik, zinokorlik, qo‘rqoqlik kabi illatlaridan saqlaydi, yoshlar hayotidagi bo‘shliqni to‘ldirib, be’mani ishlar bilan shug‘illanish uchun ularga vaqt qoldirmaydi.

Sog‘lom avlod sport bilan yuzaga keladi.Sport O‘zbekistonni dunyoga tanitadi.

Murod Xonto‘rayevga sport soxasidagi buyuk xizmatlari uchun "O‘zbekiston qahramoni" unvoni taqdim etilsa yaxshi bo‘lardi degan taklif bilan mazkur maqolaga nuqta qo‘yaman.



09/10/2017.

Kech soat 5:57.

Kanada, Onterio.

 

 

amir-temur-square-300x225 (300x225, 21Kb)

 

 
Еще статьи...