Поиск

Xoldor Vulqon

Oy bilan suhbat

 

 

 

Hadeb derazamdan qarayverma oy.

Qolmadimi odob, hayo va sharming?

Sendan berkingali topolmayman joy,

Kim seni kemtidi, nega yo‘q yarming?

 

 

Boshqa derazalar ketganmi  qurib,

Boqsangchi qoraygan qo‘shni darchaga?

Ko‘rpaga o‘ranib, uyquni urib,

El xurrak otmoqda, qattiq charchagan.

 

 

Soching ham to‘kilib ketibdi butkul,

Archilgan tuxumday yaltirar boshing.

Tonglarni sog‘insang quyoshni kutgil,

Miltillatma  yulduz - achchiq ko‘z yoshing.

 

 

Yo‘q-yo‘q ko‘z yosh emas, yonarqurt alar,

Balki  xasharotdir, qo‘ng‘iz yo so‘na.

Ular nigogihimni chivinday talar,

Jig‘imga tegma oy, bu yerdan jo‘na!..

 

 

Oy qo‘rqib ketdimi, bilmam, harqalay,

Chekindi aylanib yarim yortiga.

So‘ng asta berkindi misoli g‘ilay,

Kuygan bulutlarning ortiga.

 

 

 

 

13 mart, 2014 yil.

Kech soat 7 dan 35 daqiqa o‘tdi.

Kanada.



 

 

Xoldor Vulqon

Xovuz

 

 


Oydin  osmon seyfi lang ochiq,

Yulduzlar - hazina, oy -sariq chaqa.

Xovuzda ko‘zagul g‘unchasi yopiq,

O‘ltirar zangori yaproqda baqa.

 


Yulduzlar baqadan qo‘rqadi yomon,

Olov sovuq suvdan  qo‘rqqanday xuddi.

Tilini uzatib osmonlar tamon,

Baqa bir yulduzni yamlamay yutdi.

 


So‘ng yana birini, keyin boshqasin,

Yutaverdi olmos chivinday tutib.

Oy g‘arbga berkindi chiqarmay sasin,

Baqaning xovuzga sho‘ng‘ishin kutib.

 


Hayratdan ko‘zagul g‘unchasin ochdi,

Osmonda bitta ham qolmadi yulduz.

Zulmat daraxtzorlar ortiga qochdi,

Uyg‘onib kerishdi uyquchi kunduz.

 

 

 

 

12 mart, 2014 yil.

Kunduz soat 2 dan 25 daqiqa o‘tdi.

Kanada.





 

 

Xoldor Vulqon


Sozanda



Sartaroshmi aqldan ozib,

Ustarada qorlar kuragan?

Qitirlatib she‘r yozar yomg‘ir,

Devor bo‘lka nonmi nuragan?

 


Shoirman der anavi kimsa,

Bo‘lmasa ham bironta she‘ri.

Sirg‘aladi tumanda ulkan,

Doiraga tortilgan teri.

 


Tarvaqaylab borar shoxlari,

Daraxt bug‘u ekanku, qarang.

Shitirlagan, sirli tumanda,

Yomg‘irli bog‘ ko‘rinar arang.

 


Shishaverar shamol yelkani,

Hayot go‘zal, chor atrof chaman.

To‘lin oyni shodlanib chalar,

Xoldor Vulqon degan bir shaman.

 


Dandala didan -dindala didan!

Dandala didan -dindala didan!

 

 

 

 

10 mart, 2014 yil.

Sahar soat 6 dan 18 daqiqa o‘tdi.

Kanada.

 

 

 

 

Tabg‘iknoma

 


Zdg‘avstvuyte, qadg‘li g‘edaksya!


Pug‘sattan poydlanp mo‘g‘cha miyonim qoshi kamonim pag‘i paykag‘im tug‘mish o‘g‘tag‘im g‘afiqam Mubog‘ekxondi hamda sevikli qaynonam Dubog‘ekxondi bugungi xalqag‘o xotin -qizlag‘ bayg‘ami bilan chin yug‘ekdan tabg‘iklab, mubog‘ekbod etishga g‘uxsat beg‘gaysizlag‘!


Sevgilim, Mubog‘ekxon, bilaman, siz Xadg‘adagi integ‘net kapega kig‘ib, bu mubog‘ek tabg‘ikni xumog‘ ko‘zlag‘ingiz to‘la ko‘z yosh bilan o‘qib, xo‘ngg‘ak otib yig‘layapsiz.


Mendan sig‘a xovotig‘ olmeng, pag‘izodim!


Men G‘assiyaning Suzdalь tag‘aplag‘idagi Siktivkag‘ degan shaxag‘da savdo ishlab chiqag‘ish fig‘masida dvog‘nik cho‘chqabaqag‘ bo‘lib ishlayappan.


Yaqinda Sizga va pag‘zandi ag‘jumandlag‘imga Vestg‘en yunyo‘n og‘qalik yuz do‘lleg‘ pul yubog‘ganidim, yetib bog‘dimi?Iye, omadizmi? Unda men sizga jo‘natma g‘aqamlag‘ini yubog‘mappanda bundan chig‘di.Ha, kallavag‘am!


Xo‘p, mayli unda uyimizdi eshiklag‘ini makkam yopib, extyato‘lip o‘tig‘inag‘.Sutxo‘g‘lag‘ men yo‘lkig‘aga ogan pullag‘di pg‘atsenti bilan undg‘ish uchun qag‘zimdi qistap kelib, yag‘im kechasi temig‘ dog‘vozamizi tepib dag‘anglatsayam ochmelag‘.


-Mubog‘ek!Och dog‘vozani, eg‘ing gastag‘bayteg‘ Mashg‘abjondi chaqig‘ biyaqqa!Emasa uyga o‘t qo‘yamiz desayam zinxog‘ bazinxog‘ temig‘ dog‘vozamizdi ocha ko‘g‘malag‘ing.


Sizdi va Siz ag‘qalik hug‘matli qaynonam Dubog‘ekxondi yana big‘ bog‘ sakkizinchi mag‘t xalqag‘o xotin -qizlag‘ bayg‘ami bilan mubog‘ekbod etib, olis G‘assiyada cho‘chqabaqag‘ bo‘lib ishlayatkan umg‘ yo‘ldoshingiz, pg‘apessg‘ Mashg‘abjon.

 


 

 

Xoldor Vulqon

Odob

(O‘zbekiston Respublikasi KGBsining sobiq rahbari, marhum G‘ulom Aliyevich Aliyevning porloq hotirasiga bag‘ishlanadi)

 

 


Agar odam bolasi odob deb atalgan fazilatga ega bo‘lmasa, uning musulmonligi ham, nasroniyligi ham, iyudeyligi ham yolg‘on.


Odobning kushandasi kibrdir.Kibrli kimsalar o‘zidan boshqalarga xuddi chumoliga, ojiz xasharotga qaraganday qaraydilar, va alaloqibat o‘zining beodobligi bilan nazardan qoladilar.Baqavli Odam alayxissalomga sajda qilishdan bosh tortib, Yaratganning amrini bajarmagan va  Olloxning mangu la‘natiga uchragan Azozil alayxulla‘na kabi.


Bu hayot mening tasavvurimcha ulkan bir kalava ekan.Kalavaning uchini topib, tortqilasang bas, bir -biridan qiziq, ibratli voqealar chuvalanib chiqaveradi.


Bir paytlar Andijonda Shaydo Umar degan aziz do‘stim bor edi.Rahmatli Shaydo Umar aka she‘rlar, hikoyalar va qissalar yozar, ammo o‘z yozganlaridan ko‘ngli to‘lmas,garchand mendan 30 yosh katta bo‘lsalar ham o‘zlarini katta olmas, adabiyotda bilmagan narsalarini mendan so‘rab o‘rganardilar.Shu shoirning tavsiyasi bilan men Andijonning "Neftprom" mavzesida tug‘ilib, o‘sib, ulg‘ayib, polkovnik darajasiga ko‘tarilgan Sharobiddin aka ismli xarbiy ofitser haqida hotira kitobi yoza boshladim.Kitobni yozish jarayonida uyoqdan buyoqqa chopib, Sharobiddin akani bilgan insonlar, xususan uning yaqinlari, sinfdoshlari, sobiq quroldosh do‘stlari bilan yuzma -yuz suhbatlashishimga to‘g‘ri keldi.Suhbat jarayonida, ayniqsa, Sharobiddin akaning farzandlari, turmush o‘rtog‘i Lola opalar bo‘g‘izlariga qadalgan yig‘idan gapirolmay qolar, bo‘zlab yig‘lardilar.Sinfdosh do‘stlari ham Sharobiddin akani eslab, gapirayotganlarida, ovozlari titrab, bu og‘ir judolikka chidolmay yig‘lab yuborardilar. Ko‘z yosh jovdiragan ko‘zlari tangaday yaltirab, yuzlarini bir chetga burib, achchiq ko‘z yoshlarini artardilar.

Bir kuni, tasodifan Ibroxim aka Sadirov ismli polkovnik bilan uchrashib qolgan paytim, men beixtiyor o‘sha hotira kitob, va Polkovnik Sharobiddin aka haqida to‘xtaldim.Ibrohim aka avvallari uzoq yillar Germaniyadagi sobiq sovet xarbiy qo‘shinlarida qo‘mondon, keyinchalik o‘zimizda Andijon viloyat Favqulodda Vaziyatlar Boshqarmasiga, viloyat Xarbiy Komissariyatiga rahbarlik qilgan shonli o‘zbek ofitseri va halol inson Sharobiddin aka haqida yaxshi fikrlar aytib, hotirlar ekan, -Ha, Viloyatimizda bunday ajoyib insonlar, qahramon ofitserlar juda ko‘p -deb qo‘ydi.Keyin yana bir ofitser polkovnik G‘anijon Abdusalomov haqida ham yozsangiz,  ruhi shod bo‘lardi dedi.

Shundan keyin men polkovnik Ibrohim Sadirov bergan adres bo‘yicha G‘anijon Abdusalomovning uyini topib bordim.Rahmatli G‘anijon akaning o‘g‘illari va ayoli meni ochiq chehra bilan kutib olarkanlar, ichkariga taklif qildilar.Ular bilan ajoyib, inson, temir intizomli ofitser, G‘anijon Abdusalomov haqida uzoq suhbatlashdik.Ular G‘anijon Abdusalomovning hayoti va xarbiy faoliyati haqida u kishining yaqin do‘sti, O‘zbekiston Respublikasi sobiq KGBsining rahbari G‘ulom Aliyevich Aliyev bilan ham suhbatlashishimni tavsiya etdilar.


Men G‘ulom Aliyevichning uyiga bordim.Ichkariga kirib borganimda qalin polirovka stol tevaragidagi kursisida o‘tirgan G‘ulom Aliyevich Aliyev odob va hurmat bilan o‘rnidan turdilar.Soqollari olingan, kulrang sochlari ortga taralgan, oq ko‘ylakka galstuk taqqan ofitser, O‘zbekiston Respublikasi KGBsining sobiq rahbari men bilan qo‘l qisib, samimiy ko‘risharkan, uning qorin qismidagi naycha sistemaga ulangan yelim idishni ko‘rdim.Shundagina G‘ulom Aliyevichning jiddiy xasta ekanliklarini anglab yetdim.G‘ulom Aliyevich shunday ahvolda ham tushkunlikka tushmay, o‘zlarini tartibga keltirib, xonasiga kirib kelgan menday bir oddiy yozuvchini ham hurmatlab, o‘rnidan turdilar, samimiy qarshi oldilar.Biz G‘ulom Aliyevich rahmatli bilan marhum polkovnik G‘anijon Abdusalomov haqida uzoq suhbatlashdik.

Keyinchalik men ikkala ofitser haqidagi hujjatli kitoblarni yozib tugatdim.Ammo, taqdir taqazosi bilan Vatandan ketayotgan paytlarim u kitoblar qayerlardadir qolib ketdi.Qo‘lyozmalar yonmaydi degan gaplar bor.Vaqtlar kelib u yozgan kitoblarim ham topilar.

Maqoladan murod esa, xalqimizga hos, turmush tarzimizga mos yuksak insoniy fazilat -ODOB haqida va o‘zlarining O‘zbekiston Respublikasi sobiq KGBsida uzoq yillar rahbar bo‘lib ishlaganlariga qaramay, o‘zbekona odobni, samimiyatni, o‘zaro hurmatni unutib qo‘ymagan inson G‘ulom Aliyev IBRATI haqida fikr yuritmoqchi edik halos.


Men o‘sha paytlar G‘ulom Aliyevich misolida haqiqiy o‘zbek OFITsERining INSONIY qiyofasini ko‘rganman, uning kamtarligiga odobiga qoyil qolganman va u odamga nisbatan hurmatim yanada ortgan.


Bugun oddiy lattapagon melisa fuqarolarni mensimay, o‘zini salkam xudo sanab yurgan bizning zamonda G‘ulom Aliyev hayoti, faoliyati, odobi, kamtarligi ibratlansa arziydigan fazilat emasmi?


Xudo xalqimizning shonli o‘g‘lonlaridan biri G‘ulom Aliyevni o‘z rahmatiga olib, marhumning joylarini Jannatdan qilsin!

 

 

 

 

 

30 yanvar, 2014 yil.

Kunduz soat 10 dan 42 daqiqa o‘tdi.

Kanada.





 

 
Еще статьи...