Поиск

Xoldor Vulqon

O‘zbekistonda suv muammosini qanday xal qilish mumkin?

 

 

Bugungi kunda suv taqchilligi O‘zbekistonning eng og‘ir muammolaridan biriga aylandi.

"Orol" dengizi shu tarzda tobora qurib boraversa, hademay Xorazm vohasining va Qoraqalpoqiston Avtonom Respublikasining ayrim xududlari  butunlay qum ostida  qolib ketishi hech gap emas.

Keyin, bu qum bosqini O‘zbekistonning boshqa xududlariga, taxdid solmaydi, ekinzorlarga sho‘r qumlari bilan yoprilmaydi deya hech kim kafolot berolmaydi.

Bu xatarli jarayonni to‘xtatishga o‘z vaqtida amaliy harakat qilmasak, nafaqat mamlakatimiz ekologiyasi, balki uning iqtisodiyoti ham butunlay izdan chiqishi, Vatanimiz qush uchsa qanoti, odam yursa oyog‘i kuyadigan ulkan sahroga aylanishi  mumkin.

Hamma muammoni o‘z vaqtida hal qilmoqqa ulgurmoq kerakkim, muammo ham xuddi yumaloqlanayotgan qorday vaqt o‘tgan sari tobora kattalashaveradi.

Boshqacha aytsak, ko‘rimsizgina kichik muammo  vaqti kelsa, bir dona toshdek daxshatli xarsanglar ko‘chkisiga sabab bo‘lishi mumkin.

Ko‘plar xalqimizga o‘zini "aqlli" qilib ko‘rsatish uchun qachonlardir, kimlardir asos solgan va siyqasi chiqib ketgan "Sibir daryolarini O‘rta Osiyoga burish " to‘g‘risidagi utopik g‘oyani bayroq qilib, piltasi chiqib ketgan do‘ppisini peshonasiga kiyib olganicha lunjilarini shishirib, surnay chaladilar.

Ammo ular bugungi kunda hatto suv ham mamlakat va xalqlarni extiyoj kishanlari bilan tushovlab, burnidan ip o‘tkazib, siyosiy manfaatlar yetoviga solguvchi strategik ahamiyatga ega  ko‘rinmas richagka aylanganini hatto tasavvuriga ham sig‘dirolmaydilar.

Qolaversa, bu ulkan loixa qanchalar ulkan  mablag‘ talab qilishini, mablag‘ topilgan taqdirda ham, Sibir daryolarini O‘rta Osiyoga burish g‘oyasi boshqa mamlakatlar va daryo egalari tamonidan qo‘llab quvvatlanadimi yo yo‘qmi? -degan muammo borasida hatto o‘ylab ham o‘tirmaydilar.

Xo‘sh, Orol dengizini qanday qilib suvga to‘ldiramiz?

Buning bitta yo‘li bor.

 

 

BIZ YeR OSTI DARYoLARINI QUDRATLI NASOSLAR YoRDAMIDA YuQORIGA ChIQARIShIMIZ VA U DARYoLARNING EKOLOGIK TOZA, ZILOL SUVLARIDAN FOYDALANIShGA KIRIShMOG‘IMIZ KERAK.

QUDRATLI NASOSLAR BILAN YuQORIGA  ChIQARILGAN YeR OSTI DARYoLARI HAM QUMLARGA SINGIB KETMASLIGI UChUN SUV JOYLARGA QUVIRLAR YoRDAMIDA UZATILIShI KERAK.

BU SUV NASOS INShOATLARI QURILIShIGA SARF BO‘LADIGAN HAR QANChA MABLAG‘ O‘ZINI OQLAYDI.

 

 

Bu kabi gidroinshoatlarning aksariyati Orol dengiz  atrofida barpo etilsa, quvirlarga sarflanadigan katta mablag‘ tejab qolinadi.

Yer yuzasiga chiqarilgan yer ostki daryolariga to‘g‘on solib, mikro gidroelektrostantsiyalar ham qurish mumkin.Bu esa, O‘zbekistondagi bugungi mavjud energetika muammolarini hal qiladigan muhim omillardan bridir.

Shunday qilsak, suvni dambalab qo‘yish bilan qo‘rqitishga intilguvchi, mamlakatimizga nisbatan nodo‘stona kayfiyatdagi ayrim kuchlarning taxdididan halos bo‘lamiz.

O‘zbekiston misli ko‘rilmagan darajada gullab yashnaydi, boyiydi.

Hatto Orol dengizida baliq yetishtirib, chet ellarga ikra eksport qilish imkoniyati paydo bo‘ladi.

Sallani emas, kallani ishlataylik, aziz o‘zbekistonliklarim!

Imkoniyatlarimiz olis sibirlarda yo qo‘shni mamlakatlar qo‘lida emas, boylikdan kekkaygan nodon kimsalar osmonga qaraganicha odimlab, oyoqosti qiladigan, ota buvalarimizdan yodgor, mana shu kamtarin, hoksor  tuproqlarimiz ostida yotibdi.

Bu g‘oya hammamizniki bo‘lsin.

Barcha o‘zbekistonliklarga yaxshi tilaklar bilan, Xoldor Vulqon.

 

 

 

23 noyabr, 2013 yil.

Kunduz soat 11 dan 41 daqiqa o‘tdi.

Kanada.

 

 

 

Xoldor Vulqon

 

HALOL MULKKA HECH QACHON OFAT YETMAYDI

 


Men o‘zbek milliarderi Alisher Burxanovich Usmanovni faqat boyligi uchungina emas, u INSONning kamtarinligi, halolligi, to‘g‘riso‘zligi uchun qattiq hurmat qilaman.Men millatchi yo irqchi emasman.Ammo boshqa xalqlarni ham hurmat qilgan holda Alisher Burxanovichning o‘zbek ekanidan fahrlanaman.Alisher akaning jurnalistlar bilan o‘tkazgan suhbatlarini kuzatib, hulosalar chiqaraman.Jurnalistlar ba‘zan unga qaltis va nozik savollar bilan  murojaat qilib,"qarmoq" tashlab ham ko‘radilar.Misol uchun "Siz musulmonligingizdan kelib chiqib, zakot to‘laganmisiz?" deganday. Aslida savolni bu tarzda berilishining o‘zi kulgili.Axir o‘zingiz o‘ylang, musulmon odam zakotni to‘lab, men zakot to‘ladim deydimi?Unda zakoti riyo, amali xabada bo‘lmaydimi?Albatta bunday savolni Islom ahkomlaridan butunlay behabar odamlargina berishlari mumkin.Tevarakdagi molu dunyo ortdirgan va topgan tutgan molidan judo bo‘lib, oyog‘i osmondan bo‘lgan kimsalar taqdiriga nazar soling.Agar boylik egasi zakot to‘lamasa, dunyoviy qilib aytganimizda hayru exson qilmasa, yoki Xudo qaytargan gunox ishlar bilan shug‘illansa, albatta uning moliga ofat yetadi.Boyning moliga ofat yetmayotgan ekan, demak u zakot to‘lagan, hayru ehson qilgan bo‘ladi. Alisher Burxanovichning molu dunyosiga ofat yetmayotganini, aksincha u boyliklar Xudoning hikmati bilan ko‘payayotganini butun dunyo ko‘rib turibdi.Hatto Alisher akani siyosiy o‘yinlarga, fitnalar botqog‘iga sudrab, muxolifat deb aytiladigan allaqanday guruxlarni qo‘llamasligidan noliydiganlar ham bor.Go‘yo Alisher aka endigina biznesini rivojlantirayotgan paytlar unga bir so‘m berib qo‘yganday undan hafa bo‘ladilar.Nima, Alisher aka, muxolifat deb atalguvchi bir birlarining ko‘zlarini o‘yishga tayyor, siyosat, siyosiy madaniyat nimaligini bilmaydigan savodsiz, qandaydir parokanda guruxlarning so‘qir to‘dasini qo‘llab, urushlarga yo‘l ochib, begunox vatandoshlarimizning qirilib ketishi, bolalarning qonlari to‘kilishi, ota -buvalarimiz barpo etib ketgan muazzam shaharlarimizning vayron bo‘lishi uchun investitsiya yotqizsinmi?Meni eng hayron qoldirgan yana bir narsa, Alisher Usmanovning o‘z intervьyusida: -Bilmadim, balki o‘z vaqtida xalqqa, elga halol xizmat qilgan, ammo xizmatlari qadrlanmagan ajdodlarimga berilishi kerak bo‘lgan bu boyliklarni Xudoi Taolo menga bergan bo‘lsa kerak deya olg‘a surgan taxmini bo‘ldi.Men Alisher Burxanovichning mana shu taxminiga qoyil qoldim.Ha, buyuk odamlarning fikri ham buyuk bo‘ladi.Alisher akaning yuqorida aytgan gaplari Qur‘on hikmatlariga hamohang.

Eslang, o‘tgan ramazon oyida biz hurmat qilgan Amerika Qo‘shma Shtatlarining prezidenti janob Barak Obama o‘zi xristian bo‘lishiga qaramay, Oq Uyda musulmonlar uchun iftorlik berarkan, og‘iz ochilishi oldidan qisqa, ammo hikmatli nutq so‘zladi.Janob Barak Obama Qur‘oni Karimdan "Zarrotun hoyran yaro va zarratun sharron yaro" oyatini keltirib, Xudoi Taolo zarracha qilingan yaxshilikni ham abatta munosib taqdirlaydi.Ya‘ni yaxshilikning katta kichigi bo‘lmaydi.Biz esa garchand dinimiz boshqa bo‘lsada, hammamiz Xudoning bandalarimiz.Bir birlarimizga yaxshilikni ravo ko‘raylik.Barcha musulmonlarni ramozon ro‘zasi bilan muborakbod etaman.Ro‘zadorlar ertalabdan beri tuz totmaganlar.Qorinlar ancha ochib qolgan.Shuni xisobga olgan holda, sizlarni toliqtirib qo‘ymaslik uchun so‘zimni yakunlayman -dedi u o‘zining mashhur tabassumi bilan jilmayib.Ya‘ni uning so‘zlari ham janob Alisher Usmanovning aytgan gaplariga mazmunan yaqin yangradi.Ha, Xudo har bir zarra yaxshiligimizni mukofotsiz qoldirmagani kabi, har bir zarra yomonligimiz uchun ham muayyan va muqarrar jazolarni belgilab qo‘yganki, u narsalar sizga yetmasa, sizning kelajak avlodlaringizga albatta yetadi.

Xulosa shu. Birovni g‘iybat qilmay, nohaq taxqirlamay, yomon so‘zlar bilan diliga jarohatlar yetkazmay, zulm qilmay  yashashga harakat qilishimiz kerak ekan.

Bu borada Xudo baraka bergan Alisher Burxanovichning tutgan pozitsiyalari hammamiz uchun buyuk ibratdir.

Chunki Alisher Burxanovich o‘zining bitmas tuganmas boyliklariga mag‘rur emaslar.

Aksincha, oddiy, TOZA, HALOL ODAM  bo‘la olish har qanday boylikdan yuqori ekanligini chuqur anglab yetgan, donishmand va kamtarin insondirlar.

U INSON ALIShER NAVOIYning: "Ey, Navoiy, hech kishi davlatga mag‘rur o‘lmasun" degan misralarini o‘qiganlar va shunga qat‘iy amal qiladilar.

Alisher aka, yaqinlaringiz va biz kabi do‘stlaringiz baxtiga doimo sog‘ va omon bo‘ling! Hurmat bilan, Xoldor Vulqon.

 

 

 

 

17 noyabr, 2013 yil.

Kunduz soat 11 dan 6 daqiqa o‘tdi.

Kanada.



 

 

Xoldor Vulqon


Xudoning Kitoblariga oddiy kitoblarga qaraganday qarash gunox emasmi?

(Muhammad Solix va Jamol Kamollarning ijodiy faoliyatlariga ayrim chizgilar)

 

 

Ko‘plar dunyo hoyu havaslariga, toju taxtga, mulku molga mehr qo‘yadilar.Donishmand odamlar esa mal‘un, ya‘ni la‘natlangan boylikni, dunyo vasvasasini tark etib, najot qo‘rg‘oniga intiladilar, shoshiladilar.Hazrati Amiri Alisher Navoiy ham muvaqqat dunyoga etak siltab, arba‘inlar yozib, tariqat, so‘fiylik yo‘lini tutib, Xudoi Taologa munojat va tavallolar qilgani tarixdan ma‘lum.Hazrati Navoiyning ijodiy umrboqiyligiga sabab ham aslida Xudoning kitobini o‘qib ulg‘aygani, yozgan asarlari o‘sha ilohiy kitob matlabi - oliy odob, husni xulq normalariga hamohang ekanidadir balkim.

XX asrning ikkinchi yarmida o‘zbek she‘riyatini toza havolardan nafaslantirib,yanada jonlantirgan, yoshartirgan iste‘dodli shoir Muhammad Solix (Salay Muhammadaminov) avvaliga Xudoning to‘rt kitobi qatoriga kirmagan otashparast Zardushtning "Avesto" hikmatlar to‘plamiga mehr ko‘rguzgan esada, keyinchalik bu yo‘ldan qaytib, Dini Islom yo‘lini tanladi.Yillar o‘tib, baayni Bobur, Mashrab, Nasimiy, Hamza, Cho‘lpon singari shoirlar boshiga yog‘ilgani kabi o‘z  boshiga va yaqinlari ustiga yog‘ilayotgan kulfatlar sababini shoirlikdan deb bildimi, xullas, Muhammad Solix(Salay Muhammadaminov) qo‘lidagi Xudo tutqazgan o‘tkir qalamini sindirib otdi, she‘r yozishni to‘xtatdi.Ammo yaqinda Muhammad Solix (Salay Muhammadaminov) she‘riyatni  shariatga mengzadi, shunday qaltis gapni aytishga  jur‘at etdi.Mening nazarimda esa shariat hech qachon she‘riyat, she‘riyat esa, aslo shariat bo‘la olmaydiganday.She‘riyatni diniy ahkomlar majmu‘i sifatida tasavvur qilishning o‘zi nojiddiylik bo‘lardi. Hatto  diniy ahkomlarga esh Faridaddin Ibrohim Attor, Mavlono Jaloliddin Balhiy, Yassaviy, Mashrab, So‘fi Olloyorlarning she‘riyati bo‘lgan taqdirda ham.She‘riyatni shariatga mengzash xuddiki  imomlar she‘r  ohangida nazmiy ma‘ruza qilishlariga yo‘l ochishday, fatvo berishday, bir buyuk fitnani boshlashday, sodir etishday yangramoqda.Qolaversa, she‘riyatni ham sekin asta  qopga, qolipga solishga initilish kabi taasurot uyg‘otadi u so‘zlar.To‘g‘ri ustoz shoir Muhammad Solix (Salay Muhammadaminov) u so‘zlari bilan "she‘rlari shariat axkomlari talabiga javob beradigan bo‘ldi" deya quvonmoqdalar.Ammo "she‘riyati shariat bo‘ldi" degan so‘z ortidan yuqorida biz aytgan fitnalar qoyim bo‘lmasligiga ham hech kim kafolat berolmaydi.Inchunun, shariat masalasi g‘oyat nozik masaladirkim, unga juda extiyotlik bilan yondoshmoq kerak.Men bir hadis o‘qigandim.Unda payg‘ambarimiz alayxi saloti vasallam shunday deydilar: Kimki bir yaxshi ishni boshlab qo‘yib olamdan o‘tsa, o‘sha ishdan hosil bo‘ladigan savoblar to ro‘zi qiyomat o‘sha bandaga borib turaveradi.Kimki biror fitnani boshlab qo‘yib olamdan o‘tib ketsa, o‘sha fitnadan hosil bo‘lgan gunoxlar to ro‘zi qiyomat o‘sha bandaga to‘xtovsiz borib turadi -deydilar janobi payg‘ambarimiz.Balki Muhammad Solix mening bu yozgan so‘zlarimni g‘azablanib o‘qiyotgandir.U inson o‘zi musulmon bo‘laturib, birov yozgan narsalarni o‘qib ham "Nima? Qayerda? Men endi sizdan eshitayapman.Men unday narsani o‘qimadim" deya yolg‘on gapirmaydilar, o‘zlarini katta olib,kibrga berilmaydilar. Qaytaga yana bir daxshatli xatodan ogoxlantirganimiz uchun (Garchand tashakkurga yarasha ish qilmagan bo‘lsakda) bizga g‘oyibona TAShAKKUR deya, yaratgan Parvardigori Olamga istig‘for aytadilar.Yaqinda najot qo‘rg‘onining nurli devori ostida haybatlanib turgan yana bir shoirimizni ko‘rib qoldim.U aruz vaznida Erkin Vohidov, O‘lmas Jamollarning yozganlaridan ustun bo‘lsa ustunki, sira qolishmaydigan  o‘tli g‘azallar va boshqa ko‘plab go‘zal asarlar insho etgan taniqli ijodkor O‘zbekiston xalq shoiri Jamol Kamol edi.Jamol aka yaxshi niyyat bilan Qur‘on suralarini, oyat ba oyat she‘rga solib, asar yozmoqchi ekanlar.Mening diniy ilmim yetarli emas.Ammo bir shogird, havaskor ijodkor sifatida ulug‘ shoirimiz Jamol Kamol boshlagan shu ish to‘g‘rimikin deya o‘ylanib qoldim.Ya‘ni deylik, shoirlar yozyaptiyu, nega bizga mumkin emas degan nuqtai nazarda ertami kech, bironta hofizning kallasiga Qur‘on suralarini kuyga solish, qo‘shiq qilib  kuylash fikri kelib qolmasmikin?O‘sha qo‘shiqlari bilan avval televideniya orqali, so‘ng to‘ylarda, mast -alast davralarda qistir -qistir uchun doirani tezlamasiga chalib, sho‘xidan aytib,  jiddiy narsalarni mazammatga aylantirib yubormasmikanlar?Musiqachilardan keyin rassosmlar ham sura va oyatlarni mato va moybo‘yoqda aks etdirsakchi? -deya o‘ylanib qolsalar nima bo‘ladi?Keyin, "Jamol aka aytdilar, suralarda qofiyalar bor ekan.Qur‘on ham she‘riy usulda yozilgan ekan.She‘riy majmuani esa biz adabiyotshunoslar bir qator ko‘zdan kechirib qo‘yishimiz kerak" deydigan "o‘yinchilar" chiqib, din dushmanlarining buyurtmasini bajarib bermaydi deya kim ayta oladi?Keyin haykaltaroshlar...Eng xavflisi, ularning so‘zlari mo‘‘tadil islom tarafdorlari va radikal qarashdagi dindorlar orasida nafratni kuchaytirib, to‘xtatib bo‘lmas urushlarga sabab bo‘lishini, mamlakatimiz milliy havfsizligiga taxdid soladigan navbatdagi bosh og‘riq bo‘lishini  ham o‘ylab qo‘ysak yomon bo‘lmaydi. Eng daxshatlisi, bu kabi fitnalar qoyim bo‘ladigan bo‘lsa, gunoxi Jamol akaning gardaniga yozilib qolmasmikin?degan muloxazalarga duch keldim.Yaxshilab e‘tibor bering.Navoiydek Qur‘oni Karimni yod bilgan, "Hamsa" yozgan ShOIR she‘riyatni shariat demadilar va Qur‘onni she‘riy usulda yozishga azimat qilmadilar.Xudoning so‘zlari nazmiy ohanglarda bandalar qalbiga tezroq yetib boradi deya oddiy she‘riyatni shariatga, Xudoning kitobini she‘riy kitobga mengzamadilar.Sharq she‘riyatining sultoni, amiri Alisher Navoiy hazratlari Xudoi Taolo o‘z muqaddas kitoblaridagi so‘zlarni Qolu Boloda, Alminsohda, Lavhul Maxfuzdayoq bandalar qalbiga tez yetadigan, ohangdor qilib qo‘yganini, hikmatlarni Xudodanda o‘tkizib aytish yoki yozish bandasining qo‘lidan kelmasligini anglab, hayo qilganlar, bu borada qaltis gaplarni aytish yo yozishdan tiyilganlar. Muhammad Solix (Salay Muhammadaminov) va Jamol Kamollar Xudoning Kitoblari haqida bir narsa yozishdan avval  Navoiy bobomiz kabi jiddiyroq, teranroq  o‘ylasalar bo‘larmidi deymanda.Xususan, mening bu ikki ijodkorga, Muhammad Solixga ham Jamol Kamolga ham  xasad yo xusumatim yo‘q.Faqat ular qo‘l urayotgan ishlarning g‘oyat qaltisligi haqida bir uka, bir do‘st sifatida ikki dunyolik xatardan ogoxlantirib qo‘ygim keldi halos.So‘zlarim og‘ir botgan bo‘lsa, avvaldan uzr so‘rayman.Hurmat bilan, Xoldor Vulqon.

 

11 noyabr, 2013 yil.

Kunduz soat 11 dan 26 daqiqa o‘tdi.Kanada.

 

 



 

Xoldor Vulqon


Aqlingizga balli


Ona tilimizda shunday terminlar borki, unday terminlarni boshqa biron tilda uchratolmaysiz.Misol uchun "ichkilik" degan so‘zni.Afg‘on o‘zbeklari bilan suhbatlashsangiz, ular "sigaret ichaman" deydi va  bu so‘zlarni eshitib, azbaroyi hayratdan ko‘zlaringiz g‘ilay bo‘lib qolishi mumkin.Lekin o‘zimizning "Suv ichamiz" degan so‘z birikmamizdan aslo hayratga tushmaysiz.Avg‘on o‘zbeklari esa, yana sizni badtar hayratlantirib, ichkilik so‘zini "Ichki" deb ataydilar.Nimaiki ichga yutilsa u ichki, ya‘ni ichkilik ekanini anglolsay edik, ularning so‘zlaridan bunchalik hayratlanmagan bo‘larmidik.Aslida biz O‘zbekistonlik o‘zbeklar ular aytgan "Ichki" so‘ziga "Lik" qo‘shimchasini qo‘shib aytamiz halos.O‘zbekistonlik o‘zbeklar boshqa xalqlarga qaraganda ko‘proq narsalarni ichiga yutadi.Sigaret chekish, spirtli ichimlik ichish, kimyoviy og‘uga bo‘ktirilgan dori -darmonlarni ichaverib, ichi aptekaga aylanib ketishi, yoki deylik tirikchilik dardida "kurьer" bo‘lib, nasha o‘ralgan salafan konteynerlarni  yutish ham gapmi? Bu xalq o‘z tashvishlarini, g‘amini, qayg‘usini, hasratini, alamini,  ovozini, sabru qanoatini hatto nafasini ichiga yutib yashash san‘atini puxta egallagan sayyoramizdagi yagona, donishmand  va iste‘dodli xalqdir.Balki biz o‘zbeklar tashqaridan biroz mazlumday, quldek ko‘rinarmiz, ammo biz boshqa xalqlarni hayratda qoldirib, teshik -tuynuksiz eng qattol zulmat zindoniga qamab qo‘ysalar ham, go‘yo hech narsa bo‘lmaganday,  ichimizda maza qilib, hur -ozod yashayveramiz, jilmayib turaveramiz.Bizning shunday buyuk ichki hurriyatimiz, botiniy mustaqilligimiz borki, uni hech qanday tashqi kuch bizlardan tortib ololmaydi.Buyukligimizning siri ham shunda.Bizda har bitta odam o‘zi aloxida mustaqil mamlakat va ularning har biri o‘zining aloxida qonunlar majmu‘iga, ya‘ni ichki konstitutsiyasiga, o‘z mafkurasiga, bayrog‘iga, gimniga ega.Bu mamlakatlarga bostirib kirib, qal‘ai istexkomlarini vayronaga aylantirish, muqaddas tuproqlarini bosib olishning sira iloji yo‘q.Ularning o‘z qal‘alari va iskandar devoridanda balandroq, xitoy devoridanda xashamatliroq, mustaxkam devorlari bor.Eng xarakterli tamoni, u metin devorlar, u muxtasham qal‘alar ko‘zga ko‘rinmaydi.U devorlar ortida nimalar kechayotganini o‘sha bepoyon va ozod mamlakatlarning kambag‘al hukmdorlrigina biladilar halos.Deylik, u botinan mustaqil va ozod odam, boshiga gumbazday sallani silliq o‘rab, egniga adras chopon va oyoqlariga amirkoni maxsi va Pop kalish zavodining tosh kalishidan kiyib olib,  ko‘zingizga tik qaramay, tasbex o‘girib,  sizga dinu imondan, poklikdan, halol va xarom, gunoxu savob, Jannatu do‘zax, jahannam azoblariyu Behisht rohat -farrog‘atlari haqida ko‘zlarida yosh bilan ma‘ruza o‘qisada, o‘zi ichkilik, iblisona maishat, ishrat, zino yoki dayuslik bilan faol shug‘illansa, uning bu ichki illatlarini biz qayoqdan ham bilamiz?Bu masalaning xatarli tamoni.Ichki mustaqillikning, ruhiy ozodlikning yaxshi tamoni ham yo‘q emas.Farazan, bir uyni ko‘z oldingizga keltiring.U uy qadim zamonlarda qurilgan bo‘lsayu, uni ichidan emas, tashqarisidan, suvga chidamli tempera guashi bilan muttasil bo‘yayversangiz.Bir kuni bu go‘zal imoratning tomi ketishi va bir yonga qiyshayib, bahaybat sandiqday ag‘anayotganda: -E, qoch, uy qulayapti! -deyishga zo‘rg‘a ulgurib, tashqariga qochib chiqishingiz, yoki qochib chiqishga ham ulgurolmasligingiz mumkin.O‘sha imoratni ichidan mustaxkam metall skelet -karkaslar bilan qayta rekonstruktsiya qilinsa, u imorat  tashqaridan biroz ko‘rimsizday tuyulsada, qulamaydi, yarim kechasi uxlayotgan odamlarni bosib qolmaydi.Mana ko‘rdingizmi, har bir fuqaroning alohida ichki induvidual botiniy mustaqilligi, ruhiy ozodligi, ichki qonunlariga amal qilib yashash hurriyati ne chog‘li ahamiyatli!Davlatni idora qilish ham aynan shunday.Agar mamlakatimiz mustaqilligi, ozodligi chinakam bo‘lishini istasak, biz birinchi navbatda har bir fuqaroning ichki istiqlolini, hurriyatini, hurmatlashimiz, ularning konstitutsiyasidaga ko‘zlangan manfaatlarga toqatli bo‘lishimiz, har biri o‘z mustaqilligini e‘lon qilgan u mikromamlakatlarga zulm bilan emas, mehr -muruvvat, do‘stona niyyat va ezgu maqsadlar bilan kirib bormog‘imiz, tashrif buyurmog‘imiz, ularning har biri bilan alohida do‘stona munosabatlarni o‘rnatmog‘imiz, u muazzam va muxtasham hamda mustaxkam qal‘alarga, istexkomlarga kirish uchun dorvozalarga urilgan qulflarning kalitini topishimiz, u mamlakatlar bilan o‘zaro teng xuquqli ma‘naviy import va eksport munosabatlarini yo‘lga qo‘ya bilmog‘imiz kerak bo‘ladi.Toki mamlakat fuqarolarining har biri alohida o‘z botiniy mustaqilligiga, ruhiy ozodligiga erishmas ekan, o‘z shaxsiy qomusiga, konstitutsiyasiga ega bo‘lmas ekan, amaldagi hukumat ular bilan xisoblashmas ekan, ularning gimnini birga kuylamas ekan,mamlakatning milliy mustaqilligi qog‘ozlarda qolib ketaveradi.

Mana shunday ishlarni amalga oshirish qo‘lidan keladigan, aqlli, mulohazali prezident kerak O‘zbekistonga.

Gap kim haqida ketayotganini darrov angladingiza.Ming qilsa ham o‘zbeksizda.

Aqlingizga balli!

 

 

 

9 noyabr, 2013 yil.

Kunduz soat 10 dan  57 daqiqa o‘tdi.

Kanada.

 


 

Xoldor Vulqon


Shafqatsiz fasl

 

 

 

Kuz yana kelganmish,

Menga bu haqda

Za‘faron yaproqlar pichirlab aytdi.

 

Ular kuzdan qo‘rqadi juda.

 

Chunki kuz shafqatsiz.

U bog‘dagi daraxtlarni

Qip -yalong‘och qilib yechintirarkan,

Anorlarni yorib, tirjaytirib,

Dala -dashtni ship -shiydam qilar.

 

Gala-gala uchgan qushlarni esa,

Haydab yuboradi yot o‘lkalarga.

 

Ayniqsa,

Sovuq izg‘irinli shudgorda yolg‘iz

Xorg‘in, ma‘yus chiroqlari bilan

Tumanli zulmatni yoritganicha

Dala etagida o‘rmalab yurar

Yolg‘iz traktor.

 

Tumanlarning pardasi aro

Xira ko‘rinadi

Uvotlarda yoqilgan gulhan

Va paxtalik shim kiygan traktorchining

Shu‘lalardan yorishayotgan

G‘amgin chexrasi.

 

Oy gezarib qaqshar sovuq osmonda,

Yulduzlar qaltirar

Moviy dengizdagi uvildiriqday...

Hammadan ham,

Kuppa-kunduz kuni dildirab,

Bulutlarning uvadasiga o‘ranib olgan

Quyoshni hamda,

Ko‘z yoshlarin to‘xtata olmay

Yum -yum yig‘layotgan

Yomg‘irlarni ko‘rsangiz edi...

 


Kuz shunday beshafqat fasldir, do‘stim.

 

 

 

 

 

12 oktyabrь, 2013 yil.

Tongi soat 6 dan 12 daqiqa o‘tdi.

Kembridj shahri, Kanada.

 

 

 
Еще статьи...