Поиск

 

Холдор Вулқон

Ўзбекистон Ёзувчилари уюшмасининг аъзоси





Ҳурматли Алишер Бурхонович!


Менда учта таклиф бор.


1. Маълумки, ҳанузгача Ўзбекистон Республикасининг ўз хусусий космик сунъий йўлдоши йўқ. Сизнинг ҳомийлигингизда космосга Ўзбекистоннинг сунъий йўлдоши учирилса. Космодром қурилсаю, космик кемаларимиз фазога парвоз қилиб, бизнинг ҳам астронавтларимиз бошқа сайёраларга ЎЗБЕК байроғини ўрнатсалар.Бу тарихий буюк лойиха Ватанимиз иқтисодий салохиятини юксалтириш билан бирга, мамлакатимиз мудофаа қувватини ҳам оширган бўлар эди.


2. Сизнинг ҳомийлигингизда илму фан, адабиёт ва санъат соҳалари учун халқаро мукофот таъсис этилса.


3. Ватанимиз пойтахтига сизнинг ҳомийлигингизда Париждаги Эйфел минораси каби инсониятни ҳайратлантирадиган маҳобатли осмонўпар биронта минора қурсак.Бу қурилма Ватанимизда туризм бизнесини ривожлантириб, давлат ғазнасига ҳар йили миллиардлаб доллар маблағлар келтирган бўларди.


Бойлигингиз бундан ҳам зиёда бўлсин. Халқимиз бахтига доимо соғ ва омон бўлинг, ака!

 



23/05/2021.
Тонги 4:58.
Канада, Онтерио.



 

 

Холдор Вулқон

Ўзбекистон Ёзувчилар уюшмасининг аъзоси


Ўзбекистон Республикаси президенти Шавкат Мирзиёевга мурожаат




Ҳурматли Шавкат Миромонович!

Менинг бу мурожаатимга кўзингиз тушадими, йўқми, буни билмайман.
Қолаверса, мамлакат иқтисодиётини юксалтириш йўлида туну кун бош қотираётган етук иқтисодчи олимлар, мутахассислар борлигини биламан.
Шунга қарамай, мен ҳам узоқдан кўзга ташланаётган айрим камчилик ва муаммоларга фикрингизни қаратмоқчи эдим.

Маълумки, жамиятимизда ишсизлик муаммоси мавжуд.Айнан шу сабаб, ёшу қари ўзбекистонликлар қўшни мамлакатларга иш ахтариб кетаётгани ҳеч кимга сир эмас.

Ҳа, энди меҳнат мухожири бўлиб ишласа, улар тўлаётган банк хизмати тўловларидан мамлакат ғазнасига миллиардлаб пул тушяптию деймиз баъзан, ўзимизни овутиб.

Бироқ, улар ўзларининг арзон ишчи кучи билан бошқа мамлакатлар иқтисодиётини бойитаётгани ҳақида ва агар, ўзимизда етарли ишчи ўринлари бўлса, ўз халқимиз меҳнати эвазига ўзимизнинг мамлакат иқтисодиёти шиддат билан юксалиши мумкинлиги тўғрисида ўйлаб кўриш бироз эсдан чиқиб қолаётгандай туюляпти, менинг назаримда.

Хорижий инвестиция, ва халқаро банклардан олинадиган кредитлар ҳам яхши.Аммо, мавжуд муаммолар бу билан ҳал бўлиб қолмайди.

Таклиф қуйидагича:

Меҳнат мигрантлари оқимини тўхтатиш ва ишчи кучи эвазига олинадиган фойда тўлиғича ўзимизда қолиши учун, энг аввало етарли ишчи ўринларини яратиш, пахта, пилла, сабзавот, мева чева, полиз экинларидан экспортбоп махсулотлар ишлаб чиқарадиган завод, фабрикаларимизнинг, енгил ва оғир саноат корхоналаримизнинг гувиллаб ишлаб туришини йўлга қўймоғимиз керак.

У завод фабрикаю саноаат корхоналари қандай қилсак, гувиллаб ишга тушадию уларни ким юргизади?

Албатта дехқон ва чорва фермерларимиз, ишбилармон тадбиркорларимиз.

Бунинг учун мамлакат банк тизимидаги бюрократия ва таъмагирликка барҳам берадиган, фермерларимиз ва тадбиркорларимиз оёқ қўлларини кўринмас кишанлардан озод қиладиган, улар банкдан попка попка хужжатларсиз, тез ва гаровсиз  кредит оладиган шаффоф банк тизимини ташкил қилмоғимиз, мамлакат банк тизимида туб ислохатлар ўтказмоғимиз зарур.

Банкдан гаровсиз, тез кредитлар олишни ташкил қилиш, банк ва қарз олувчи фуқаро ўртасида ўзаро ишончга кафолат берадиган янги "моргич" системасига ўтишимиз керак.

Моргич шундай нарсаки, у фуқароларни ёшлигидан тўловларни ўз вақтида тўлаб боришга кўниктирадиган, мажбуриятдир.

Яъни, фуқаро кичик кичик нарсаларни кредитга сотиб олиб, ё ижара ҳақларини ўз вақтида тўлаб бориб, банклар ишончига киради.

Агар фуқаро бирон жойда ишламаса, ё дейлик, эътиборсиз бўлиб, тўловларни ўз вақтида тўлаб бормаса, ундай фуқаро ўз ўзидан банк олдида ишончни йўқотади ва кредит олиш хуқуқидан ўзини ўзи махрум этади.

Ундай одам мамлакатнинг қай худудига бормасин, паспортини тақдим этиши билан маълумотномалар базасидан унинг кирдикорлари чиқиб келади ва банк унинг аризасини инкор қилади.

Муқим бир жойда ойлик маош олиб ишлайдиган, тўловларни ўз вақтида тўлашдек темир интизомга кўниккан, ишончдаги фуқаролар эса, истаганларича банкдан кредит олишлари, фермерлик ёки тадбиркорлик билан шуғилланиши мумкин бўлади. Бундай банк системаси ва ўшандай ишончга кирган фуқаролар қатлами мавжуд жамиятда биров бировни алдай олмайди, ҳамма тўғри ишлашга мажбур бўлади, тадбиркорлик гуллаб яшнайди.

Банк тизимидаги бюрократия ва таъмагирлик йўқ қилинса, мамлакат иқтисодиёти шиддат билан юксала бошлайди.


Ундай тоза жамиятда ким кимдан қаллоблик йўли билан неча тийин уриб қолса, у ҳақда хабар бир зумда банкка ва банк орқали пули уриб қолинган мижозга автоматик тарзда етиб боради.

Ақчани уриб қолган дўкон, муассаса, ё компания эса, банк ишончини йўқотиб, кредит олишдан махрум бўлади.

Шу фожия юз бермаслиги учун биров бировнинг бир чақасига ҳам тегмайдиган, теголмайдиган бўлади.

Бундай банк тизими нафақат одамларни, балки бутун бошли жамиятни ёлғон гапирмайдиган ва алдамайдиган қилиб тарбиялайди.

Ёлғон гапирилмайдиган ва биров бировни алдамайдиган жамиятга эса, Худо  қут -барака ёғдиради.

Тараққий этган мамлакатларнинг иқтисодий бақувватлиги, ободлиги шундан.

Халқимиз бахтига доимо соғ бўлинг, ака! Эътиборингиз учун катта раҳмат.




12/06/20121.
Кудуз соат 10:58.
Канада, Онтерио.

 



 


 

Ёзувчининг қуйидаги сурати адабиётимиз жонкуярларидан бири, Нигора Умарованинг ФБ саҳифасидан олинди.


Таъзия


Бир куни "Шарқ юлдузи" журнали идорасига кирсам, шоир Икром Отамурод: "Холдор, укажон,"Ўзбекистон адабиёти ва санъати" газетасида менга бағишланган шеърингиз эълон қилингач, шоир ёзувчилар сизни сўрайвериб, менга тинчлик беришмаяпти.Жуманиёз Жабборов ҳам "Холдоржон Тошкентга келса, айтинг, бизнинг ишхонага бирров келиб кетсин" дегандилар деди у.


Мен Маданият вазирлигига бориб, раҳматли Жуманиёз Жабборов билан учрашдим.Биз узоқ суҳбатлашдик.


-Холдоржон, биласиз, Худойберди Тўхтабоев бизнинг қудамиз бўладилар. Абдулла Орипов ҳам. Куёвимиз, яъни Худойберди Тўхтабоевнинг ўттизга кирган ўғиллари кутилмаганда вафот этдилар. Бу мусибат Худойберди аканинг қоматини эгиб қўйди.Илож топсангиз, Худойберди аканинг уйларига бориб, дуои фотиха қилиб, ҳол -аҳвол сўраб қўйсангиз, кўнгиллари кўтарилади -дедилар.Менинг ўша куни зарур ишларим чиқиб, Худойберди Тўхтабоевга таъзия билдиргани янаги келганимда кирарман дебман.Қолган ишга қор ёғар деб машойихлар бекорга айтмаган эканлар. Ўғилларининг вафоти муносабати билан Худойберди Тўхтабоевга таъзия изҳор қилолмадим.


Мана неча йилларки Ватанимдан узоқда, Америка қитъасида яшаётганимга қарамай, ҳамон устоз Худойберди Тўхтабоевни яхши ҳотиралар билан эслайман.Ахир, шу ёзувчининг ажойиб асарларини ўқиб, улғайганмиз.Қолаверса, Худойберди Тўхтабоевнинг камтарин, кичиккўнгил, одамохун инсон эканликларига у ёзувчи "Ёш куч"журналида бош мухаррир бўлиб ишлаётган пайтлари амин бўлганман ва Худойберди Тўхтабоевга янада ҳурматим ортган.Ўшанда "Ёш куч" журнали Қатортол кўчасидаги 64 уйда жойлашган эди, адашмасам.Мен бир попка шеърларимни қўлтиқлаб, ўша бинога бордимда, "Ёшлик" журнали редакциясини ахтариб, "Ёш куч" журнали идорасига кириб қолибман.Шунда журнал бош мухаррири
Худойберди ака ёшлари улуғ, таниқли ёзувчи бўлишларига қарамай ўринларидан турдилар ва мен билан самимий кўришдилар.Сўнг мени эргаштириб, коридордан юрарканлар, "Ёшлик" журнали редакциясига олиб кириб, мутасаддилар билан таништирди.Кейин узр сўраб, яна ортларига қайтдилар.Дилида кири кибри йўқ,камтарин бу ёзувчини шу шу ҳурмат қиламан, бот -бот эслайман.

Бугун устоз оламдан ўтибдилар. Эшитиб, қайғуга ботдим. На чора, бандачилик. Худойберди Тўхтабоевни Худо раҳмат қилсин. Ётган жойлари обод, руҳлари шод бўлсин.Марҳумнинг оила аъзоларига, дўстларига ва шогирдларига чуқур таъзия изҳор этамиз.


Холдор Вулқон

Ўзбекистон Ёзувчилар уюшмасининг аъзоси



 

 

Холдор Вулқон

Ўзбекистон Ёзувчилар уюшмасининг аъзоси

 

 

Йиллар учиб ўтди бамисоли ўқ,

Ғурбатда оқарди соч - соқол, муртим.

Мен сени бир зум ҳам унутганим йўқ,

Мени ҳам унутиб юборма, юртим!

 

Х.В.

 

 

Холдор Вулқоннинг набираси Абдусаломов Жасурбек Мақсудович.

 

Бир дона сўз



Мен ушбу мақоламда ЎЗБЕК деган ўз халқимни ўзга миллат ва элатлардан, юртимни ўзга юртлардан устун қўймаган ҳолда, Ватанимиз баъзи кимсалар айтганидай қарғиш тушган жой эмас, балки тупроқларимиз Оллохнинг тажаллисидан нурафшон ва серқуёш, азиз авлиёлар ҳоки ётган жаннатмакон ўлка эканини, халқимизнинг эса, ундайлар айтганидай қарғалган эмаслигини, балиқдай безабон, қўйдай ювош эмаслигини,аксинча,унинг дунёдаги энг мулохазали, донишманд ва камтарин халқлардан бири эканлигини бир дона сўз билан исботлаб қўймоқчиман.


Далаларда кетмон чопиб, ҳалол ризқланадиган оддий бир ўзбек, сайрга чиқаркан:  "Бир айланиб келай" дейди. Ёки, -ҳа, оғайни, бу ёқларда нима қилиб юрибсан? - дейилса, у: -ўзим, шунчаки айланиб юрибман - дея жавоб бериши тайин.

Бундай чуқурроқ ўйлаб кўрилса, бу дунёда ҳамма ишга бориб, уйга қайтиб, еб, ичиб, ухлаб, яна ишга қайтиб, доимо эврилиб тургувчи ер шари билан бирга ўзи сезмаган ҳолда коинот бўйлаб тинимсиз айланаётгани маълум бўлади.


Ўзбек оналари фарзандларини "айланиб кетай сендан" дея эркалайдилар.


Тарихда иккита мамлакатни идора қилган темурийзода шох ва шоир Заҳириддин Муҳаммад Бобур оғир дардга чалинган фарзанди Хумоюннинг теварагида коинотдай айланиб, унга келган дардни ўзига ўтишини, ўғлининг соғайиб кетишини Яратгандан илтижо қилиб сўраганлари ҳақидаги ривоят ҳам айланиш тушунчаси билан боғлиқ.


Дарҳақиқат, агар Яратганнинг фазлу каромати билан йўқдан бор бўлган, йўқлик рамзи нол рақамидай айлана шаклли траекторияда ҳаракатланувчи олам айланишдан тўхтаса, ҳаёт ҳам тўхтайди.

Буни қарангки, кўз илғамас, тафаккурга сиғмайдиган чексиз коинот билан бир траектория бўйлаб ҳаракатланувчи одамзод ҳам яшаб, яшаб, охир бир куни тупроққа айланади.


Агар сенинг бир дона "айланиб" деган сўзинг Ер сайёрасининг ва космик туманликлардаги тамоми бошқа сайёраларнинг, галактика ва квазагалактикаларнинг ягона механик қонунга бўйсундирилган ҳолатда муттасил ва мангу айланиб туриши, инсон ва бошқа барча мавжудодларнинг жисмидаги қон айланиши, обкаш булутлар ташиб келтиргувчи сув буғланиб, яна осмонга қайтиши, ҳамда фасллар эврилишидай ақл бовар қилмас сирли система билан узвий боғлиқ бўлса, сенинг луғотингдаги қолган сўзларда қандай ҳикматлар яширин экан, эй менинг буюк, донишманд ва камтарин халқим?!




09/03/2021.
Эрта билан соат 8:52.
Канада, Онтерио.

 

 

 

Холдор Вулқон

Ўзбекистон Ёзувчилар уюшмасининг аъзоси

 

Гуллаб, яшнайвер, жонажон Ўзбекистон!


Бу дунёда қурилган йўллар, кўприклар ўз ташаббускорларига, молияловчи ҳомийларига, ҳамда қурувчиларига то рўзи қиёмат савобу ажру азимлар йўллаб туради дейдилар ҳурматли уламоларимиз.


Дарҳақиқат, собиқ иттифоқ замонида Андижон вилоятига раҳбарлик қилган, сою анҳорлар, каналлар устига бетон кўприклар солиб, замонавий йўллар қурдирган Бектош Раҳимовни андижонликлар ҳали ҳануз катта ҳурмат билан ёдга оладилар, ҳақларига дуо қиладилар.

Андижон вилояти собиқ ҳокими Қобилжон Обидов даврида вилоятнинг Асака туманида илк бор Ўзбекистон автомобилсозлигига асос солинди.


Афсуски авваллари онда сонда бўлсада, кечгача курсисида ялпайип, қулоғини қоғоз қисқич скрепка билан ковлаб, телефонда валақлаб, ишониб топширилган мансабини суйистеъмол қилиб, халқ мулки хисобланган иншоатларни ноқонуний йўллар билан қоқи баҳосига ё сув текинга хусусийлаштириб олгувчи нопок, қўли қинғир, пихини ёрган порахўр раҳбарлар ҳам учраб турар эди. Ўз киссасини ўйлайдиган ундай сохта раҳбарчалар "фаолиятидан" бирон эслашга арзигулик нарсанинг ўзи қолмаган.

Бугун янги, озод, демократик Ўзбекистон дунё ҳамжамияти кўзи ўнгида бутун бўйи басти билан юксалиб, гуллаб яшнамоқда.Чорак асрдан ортиқ вақт давомида йиғилиб қолган муаммолар ҳал этилмоқда. Жаҳон стандартлари талабига жавоб берадиган замонавий йўллар барпо қилиниб, мамлакатлараро иқтисодий ҳамкорликларнинг гарови бўлмиш, йўл коммуникация тармоқлари янгиланиб, кўприклар қурилмоқда, шаҳар ва қишлоқлар ободончилиги йўлида улкан ишлар амалга оширилмоқда.

Шу ўринда айтиб ўтиш жоизки, айнан Андижон Вилояти ҳокими Шухрат Абдураҳмонов раҳбарлигида Андижон шаҳри ва вилоятдаги бошқа шаҳру қишлоқлар таниб бўлмас даражада обод бўлгани инкор қилиб бўлмас тарихий ҳақиқатдир.


2003 ё 2004 йиллари эдими, валлохи аълам, ҳозир  аниқ эсимда йўқ, журналистик суриштирув ишлари билан мен Андижон вилояти, Избоскан тумани, "Чувама" қишлоқ фуқаролар йиғинига бордим.


Ёшлигимда болалар билан кўча чангитиб ўйнаб, деярли Чувамада катта бўлганим учун ҳам, бу қишлоқ менга бегона эмас эди ва унинг муаммоларига бефарқ қарай олмасдим.


Муаммоларни ўрганиш жараёнида менга қишлоқнинг ҳурматли оқсоқолларидан бири Нўмонжон ҳожи ака ҳамкорлик қилдилар.

Эшитишимча, у улуғ инсон бундан бир икки йил аввал боқий оламга сафар қилибдилар, жойлари Жаннатдан бўлсин. Ҳожи ака умр бўйи халқ ғами билан яшаб, жамиятдаги айрим муаммоларни кўтариб, хал этиш йўлларини қидиргувчи ҳақиқатпарвар, жасоратли инсон эдилар. Маълум бўлишича, ўша пайтлари Пастқишлоқ деб аталган маҳаллани катта ер билан боғлайдиган, Тентаксой устига қурилган омонат ёғоч кўприк шалоғи чиқиб ётар, Пастқишлоқдан мактабга қатнайдиган мактаб ўқувчиларидан айримлари ўша кўприкдан ўтаётиб, Тентаксойга тушиб кетар, ҳатто ўлим ҳоллари ҳам юз бериб турар экан.


Биз ҳожи ака билан ўша лапанглаб тургувчи, баҳорда сел тошқинларидан қутурган сой ярим ёлчисини ювиб, қийшайтирган омонат кўприкдан аранг ўтарканмиз, Пастқишлоқдан катта ерга қатнагувчи одамлару ўқувчиларнинг сабр тоқатига қойил қолганман ва уларга ич ичимдан ачинганман.


Қани энди етарли маблағим бўлсаю, шу кўприкни таъмирлаб, ёки янгитдан қуриб, ажру савобларга эга бўлсам, чувамаликларнинг дуоларини олсам дея ўйлаган эдим ўшанда.


Ҳожи ака билан югирдик, елдик, аммо ўша пайтдаги ҳокимлар берган вадаларининг устидан чиқмадилар ва бу муаммо муаммолигича қолиб кетди.


Куни кеча ўша Нўмон ҳожи ака раҳматлини ўйлантирган муаммо хал бўлганини, одам ўтгани қўрқадиган қилкўприк ўрнида шахсан Андижон Вилояти ҳокими Шухрат Абдурахмоновнинг ташаббуслари билан оғир юк машиналари ҳам бемалол қатнайверадиган мухташам янги бетон кўприк қурилгани эшитиб, чин дилдан қувондим ва Ўзбекистон Республикаси президенти Шавкат Миромонович Мирзиёев тамонидан белгиланган иқтисодий, сиёсий ва ижтимоий ислохатларни ҳаётга тадбиқ этиш йўлида ўзининг фидоий, ҳалол меҳнатлари билан Андижон вилоятини гуллатиб, яшнатаётган Шухрат Қўшоқбоевичга нисбатан ҳурматим янада ортди.


Ахир, ҳоким деган шундай ғайрат шижоатли, ҳалол ва адолатли бўлиши керакда.



01/03/2021.
Эрта билан соат 8:50.
Канада, Онтерио.



Холдор Вулқон

 

Ойдин сукунат
(Тоғам Ҳурмуҳаммад Кенжаевнинг порлоқ ҳотирасига)



Тоға, Чувамада ҳозир ҳойнаҳой,
Оқшом тушиб, қуёш ботгандир.
Оппоқ чинни товоқ каби ой,
Тентаксойда чўкиб ётгандир?

Тошқин бузган кўприк ходаси,
Тахталари ётгандир кўчиб?
Сув кечарди сигир подаси,
У кўприкдан ўтгани чўчиб.

Қуриллайди балки бақалар,
Қирғоқларда қамишлар оҳи.
Дайди тулки сувлар ёқалаб,
Қулоқ тутар жимликка гоҳи.

Сўқмоқ уни соҳилга бошлар,
Ғир ғир эсар тунги шабада.
Кўринар сув остида тошлар,
Боғбон эса ухлар капада.

Юлдузларни жимлик хоритар,
Олис осмон -овоз етмас жой.
Қабрингизни ғамгин ёритар,
Жим -жит, сокин сукунатда ой.


22/10/2017.
Тунги соат 1 дан 21 дақиқа ўтди.
Канада, Онтерио.


Андижон шаҳрига ўрнатилган шох ва шоир Заҳириддин Муҳаммад Бобур ёдгорлиги. Буюк ўзбек ҳайкалтароши Равшан Миртожиев асари. Бронза.


 
Еще статьи...