000

Хуршид Даврон


Шоир Хуршид Давроннинг шеърларини Самарқанд гумбазларига ўхшаш 
мовий осимонларга менгзагулик.У ўзининг Ислом Каримовга бағишланган
 шеърида ҳам, фахр билан:



Кўзларимга кўриниб турар
Гумбазлари мовий Самарқанд.



дея ёзаркан, кўхна Самарқанднинг мовий гумбазлари ва минораларини 
васф этади.

Ҳа, бахиллик, хасад, ёмон хотинларга ҳос макр ва майдагаплик, 
бачканалик нелигини билмайдиган, бировнинг ҳаққига хиёнат 
қилмайдиган ҳалол, ғийбат, фисқу фасод каби иллатлардан
минг, миллион кессак отим масофада йироқ, разиллик остонасидан ўтмаган, 
мовий гумбазлар куйчиси Хуршид Даврон чиндан ҳам кўнгли кенг - 
осимон шоирдир.

У менинг "Туманли далалар қўшиғи" номли китобимни чиқариб берган. 
Бу ҳақда алохида ёзиш нийятим бор.


Холдор Вулқон

 

 

 

 

 

Холдор Вулқоннинг Торонто шаҳрида нашр этилган "Больше не умирай" 
номли шеърлар тўплами Ватанда, азиз Ватандошлар қўлида.
 
Ҳамқишлоқларим: чапдан ўнга, тиш дўхтир Январ ака ва тадбиркор 
Жумабой акалар. 

Китобни Ватанимизга кириб бориши ва халқимиз қўлига
етишида, қўрқмай: "Менга жўнатинг!" дея уй адресини айта олган, 
қариндошлар ҳам "Гап тегиб қолмасмикин?" деган ўйда ҳавотирланиб, 
мен билан телефонда гаплашгани ҳам қўрққан маҳаллар 
шундай журъат жасорат кўрсатган дўстим, халқимизнинг энг севимли 
шоирларидан бири Одил Икром, тадбиркор Жумабой ака Парпиев 
ва шаҳрихонлик шоир укам Аббос Сутонларга миннатдорчилик билдираман.

Қиёматнинг қойим бўлмаётганига сабаб, ҳали ер юзида шундай ҳалол, қалби пок, 
довюрак, журъат жасоратли инсонларнинг борлигидандир, балки.(Х.В.)

 

 

 

 

 

 

Ўзбек хайкулари

 

Холдор Вулқон ёзган хайкулардан айрим намуналар.

 

 

****
Қўшним кўчиб кетди, итини ташлаб,
Аравага юклаб кўч -кўронини.
Ити узоқ чопди, ета олмади.

 

****
Олмахон, оғзида ерёнғоқ билан,
Тик турганча, қўл қовуштириб,
Менга ҳурмат бажо келтирди.

 

****
Дўстим, қариялар уйида ўлган
Онасининг дафн маросимида,
Ҳаммадан кўп йиғлади, айтиб.

 

****
Дала шийпонида тунадим ёлғиз,
Кузги зулматларда тириллаётган
Олис тракторнинг товушин тинглаб.

 

****
Нон ҳам шу қадар қаттиқ бўладими?
Тошлар билан уриб юриб уни
Аранг синдирдим.

 

****
Сутдек оппоқ ойдин сукунат.
Бўғиқ акиллайди олисда итлар,
Нариги дунёда хураётгандай.

 

****
Тунги сукунатда чирилдоқ оҳи,
Гўё чақалоқдай эмиб ётар ой,
Тоғларнинг чўччайган маммаларини.

 

****
Ярим кеча, бепоён осмон.
Сон -саноқсиз юлдузлар,
Ҳайрат билан термулар менга.

 

****
Ой том узра порлаётган кеча
Нафасимни ичимга ютдим,
Чирилдоқлар жимиб қолмасин дея.

 

****
Идиш тақирлатиб, бақириб юриб,
Зўрға ташқарига қувиб чиқардим,
Уйга кириб олган олмахонни мен.

 

****
Тўхтасам, тўхтайсан, юрсам, юрасан,
Қўй, эргашма менинг ортимдан,
Дала узра ғамгин порлаётган ой…

 

****
Яримта адёлни бошимга тортсам,
Оёғим очилиб қоляпти тунда.
Оёғимга ёпсам, бошимга етмас.

 

****
Кулбам айвонида ўтирганимча,
Тўлин ойга боқиб, искабтопарларга,
Ҳайру эхсон қилдим қонимдан.

 

****
Ёруғ деразалар узоқдан, худди,
Зулмат кўйлагининг этакларидаги,
Тилла ямоқларга ўхшаркан жуда.

 

****
Одамларни ҳайрон қолдириб,
Суяк сотиб олдим гўшт дўконидан,
Меҳмон қилмоқ учун дайди итларни.

 

****
Камзул кийган кампир, қўлида хивич,
Эчкисини излаб юрар, чақириб
Қалин, жим -жит кузги туманда.

 

****
Қахратон қиш, совуқ изғирин,
Уйим йўқ, кираман гавжум дўконга,
Ичкарида бироз исинмоқ учун.

 

****
Телпагим, пинжагим ва чопонимни
Кузги даладаги юпун қўриқчига
Кийдириб қўйинглар, ўлганимдан сўнг.

 

****
Қармоқ ипин тортмай тур, балиқ,
Учиб кетиб қолмасин, чўчиб,
Пўкакка омонат қўнган ниначи.

 

****
Дарахт шохидаги ёлғиз зувилдоқ,
Куйлар тамом ўзин унутиб…
Ким билади, балки йиғлаётгандир.

 

****
Бошқа қиладиган иши йўқми дейман,
Санғиб юрар доим ховлима ховли
Саёқ, дайди, бекорчи шамол.

 

****
Қайчи билан ўзим тартибга келтирган
Ҳаккам -дуккам соқол -мўйловим
Чала ўрилган ўт -ўланга ўхшар.

 

****
Ҳув ана «Аторуд», «Етти қароқчи»
Анави ярақлаган чўмич юлдузи…
Капада яшайман, уйим йўқ менинг.

 

****
Қишлоққа чўкканда ойдин сукунат,
Тинглаб ётдим кулбамда ёлғиз
Тўғондаги тунги шовва овозин.

 

****
Денгиз тўлқинларидан бири,
Сапчиб, қучоғимга ўзини отди,
Дўстини соғинган одамга ўхшаб.

 

****
Деразам ортида овунчоқ бўлиб,
Новдада қалтираб турганди япроқ,
Шуни ҳам учириб кетибди шамол.

 

****
Узумзор томонда чуғурчуқлар галаси,
Шамол юлқиб кетган парашют каби,
Гоҳ у ёққа, гоҳо бу ёққа саросар учар.

 

****
Ўт -ўлан баргида омонат турган,
Шудринглар хўрсинган шамол дастидан
Кўз ёшдай дувиллаб тўкилди ерга.

 

****
Кўзгудай тип — тиниқ кузги ховузда,
Кўриниб турибди сув ўтлари аро
Билтанглаётган балиқлар ҳатто.

 

****
Ёлғизликда ақлдан озган одамдай,
Қўриқчи енгларини силкитиб, танхо,
Рақс тушар кузги ғамгин шамолда.

 

****
Сувини туширдим хожатхонанинг,
Эшитгандай бўлди бутун коинот
Сувнинг шовуллашин тунги жимликда.

 

****
Худди қўзиқорин излаётган одамдай,
Қишда ёқиб, исинмоқ учун
Далаларда тезак тераман ёлғиз.

 

****
Оҳ, қанчалар севаман
Сукунатга чўмган кимсасиз
Кузги пахтазорлар осуда тонгин!

 

****
Учиб ўтди шундоқ тепамдан,
Ҳасратли ғоғолаб, ёввойи ғозлар.
Қалпоғимни отсам етгудек жойда.

 

****
Қағиллаб юборма, қарға, илтимос,
Оппоқ сукунатга чўмган боғларда.
Тўкилиб тушмасин новдалардан қор.

 

****
Ярамас Васка, чумчуқлардан бирини еб қўйибсан!-
Деди кампир, мушугин астойдил койиб,
Дон — дун сочар экан қушларга тонгда.

 

****
Кўчага улоқтириб кийимларимни,
Уйдан хайдаб юборди хотиним мени.
Кетаяпман бошим оққан томонга.

 

****
Ёзги жазирама иссиқ.
Дала этагида жимирлар сароб,
Ҳасратли ғуриллар қайдадир ғуррак.

 

****
Одамларни чойга чақириб,
Ошпаз хотин занг чалди узоқ:
Кланг! Кланг! Кланг! Кланг!

 

****
Жийда қийғос гуллаган соҳил,
Кўзгу каби тиниқ сувлоқда
Ўз аксини ичмоқда отлар.

 

****
Бедазорда, оёқларим остидан
Потир — путур қилиб, ҳавога учган,
Бедана чўчитиб юборди мени.

 

****
Ярим кеча. Ёлғиз эмасман.
Девор ковагида чиқиллаётган
Калтакесак бор…

 

****
Соҳилдаги қуруқ қамишларнинг
Маҳзун шитирлашин тингладим
Қор майдалаб ёғаётганда.

 

****
Зулматда туртиниб, йиқилдим яна,
Даранглади оёғимга илинган челак.
Охир топиб, ёқдим шайтончироқни.

 

****
Ойдин кеча, бошини эгиб
Ортимдан эргашган дайди ит билан,
Охирги нонимни бўлишиб едик.

 

****
Мен туғилган қишлоқда ҳозир,
Бақалар қуриллаб зулмат қаърида,
Чорбоғларда ўрик гуллаётгандир.

 

***
Ярмини тўлдириб кузги осмоннинг,
Қру! Қру! -дея учган турналар охир
Туманларда кўринмай кетди.

 

****
Қиш. Ҳавода куйган резинка хиди,
Қўшним яна эски -туски этикларни,
Ёқмоқда шекилли, печкага қалаб.

 

****
Тунда жинчироқни ёқаётгандим,
Бирдан ўт илашиб, лов этиб куйди,
Соқолимнинг ярим — ёлчиси.

 

****
Ухлатмади мени тун бўйи,
Вақтни еб, хиқичоқ тутган
Бўкиб қолган соат, хиқиллаб.

 

****
Кўчиб кетган қўшнимнинг уйидаги
Эшик ғижирлади кузги шамолда,
Худди йиғлаётган одамга ўхшаб.

 

****
Дўстим йўқлаб келди дея, қувониб,
Бирдан яна сўппайиб қолдим.
Шамол экан эшикни очган.

 

****
Бева аёл ўлган эрининг,
Ботинкасига тупроқ тўлдириб,
Гул экаб қўйди…

 

****
Шамол гувиллаган зулматли тунда,
Қор учқуни тушармикан деб,
Қоронғу осмонга термулдим узоқ.

 

****
Қалин қорга ботиб, туртиниб бордим
Ой ёритган қорли далаларнинг
Жим -жит сукунатин тингламоқ учун.

 

****
Тошга қўниб турган капалакни
Чўчитиб юборишдан қўрқиб,
Жимлик нафасини ичига ютди.

 

****
Қишлоқда осуда шом сукунати.
Узоқда гаплашаётган одамлар овози ва
Эшик ғижирлашин аниқ эшитдим.

 

****
Бир -бирини чўқиб, уришаётган чумчуқларни,
Ажратиб қўйсанглар бўлмайдими,
Томошабин бўлиб туравермасдан!..

 

****
Совға қилган эдим, ҳоким, қувониб:
-Ўқиймиз, албатта ўқиймиз -деди,
Юпқа китобимни най каби ўраб.

 

****
Ошхонада чириллайверсин,
Уриб ўлдирмагин, илтимос, хотин,
Чирилдоқни шиппагинг билан!..

 

****
Шаффоф сувли ховузга боқиб,
Қотиб қолдим ҳайратдан бир зум.
Тутдек тўкилибди юлдузлар сувга.

 

****
Болалик чоғларим тунлари хурган,
«Қайтмас», «Тарзан» ва «Қоплон» деган,
Итлар овозини соғинаман мен.

 

****
«Сентениел» паркида кузги хазонлар,
Шамолда шалдираб, шундоқ ёнимдан,
Югириб ўтдилар, бир -бирин қувлаб.

 

****
Дерзам ортида кузги йўлакка,
Чинор япроқлари тўкилар аста.
Хазонларни ўйчан супурар фаррош.

 

****
Кўкда юлдузларга етишмайди жой.
Шаффоф ховуз тубида ётар,
Сувга чўккан кўзгу каби ой.

 

****
Соҳилдаги қуруқ қамишларнинг
Маҳзун шитирлашин тингладим
Қор майдалаб ёғаётганда.

 

****
Хувиллаган кузги чорбоғлардаги
Тахтадан ясалган қўлбола инлар,
Жанубга ҳасратли боқмангиз бундай!

 

****
Тоғдаги лойпахса пастак кулбамнинг,
Қамиш томин шамол учириб кетди.
Ҳайрият, ўзимга зиён етмади.

 

****
Жавдаризор узра, кўм -кўк осмонда,
Сайраётган тўрғайга қарайман дея,
Бошдан тушиб кетди қалпоғим.

 

****
Худди кинотеатр экранидаги каби,
Ой ёритган кулбам деворида,
Теракларнинг соясин кўрдим.

 

****
Севаман кеч кузги туманларни мен,
Чунки, туманларда йиғласанг,
Кўз ёшингни кўрмайди ҳеч ким.

 

****
Бир — бирининг пинжига кириб,
Уйлар ухлар, одамга ўхшаб.
Зулматда, қор ёғаётган пайт.

 

****
Куз ёмғири. Тунги деразадан,
Фонус шуъласида жимирлаётган
Кўлмакларга термулдим узоқ.

 

****
Тошбақани босиб олдимми дебман,
Занглаб кетган, ўқ тешиб ўтган,
Солдатларнинг қалпоғи экан.

 

****
Мана неча ойки бандаргохдаги
Яхтага ўғринча жойлашиб олиб,
Бепул тунаб, яшаб юрибман.

 

****
Унсиз чақнаётган баҳор чақмоқлари
Узоқ -узоқларда пайвандчи каби,
Осмон билан ерни пайвандлаётир.

 

****
Узумзор томонда чуғурчуқлар галаси,
Шамол юлқиб кетган парашют каби,
Гоҳ у ёққа, гоҳо бу ёққа саросар учар.

 

****
Янги чиққан ҳилол кенг даладаги
Пишган жавдаризор устида порлар,
Ярақлаб, қайралган ўткир ўроқдай.

 

****
Кимсасиз жим -жит ойдинлик.
Чирилдоқлар товушидан
Чирсиллайди кулбам девори.

 

 

2024 йил. Канада, Онтарио.